އިދިކޮޅު އެމްޑީޕީން މިފަހަކަށް އައިސް ބާއްވަމުން އަންނަ ސިލްސިލާ މުޒާހަރާގެ ތެރެއިން، ގަލޮޅު ދެކުނު ދާއިރާގެ މެންބަރު މީކާއިލް އަހްމަދު ނަސީމްގެ މަންމާފުޅު މަރިޔަމް ޒުބައިރު (މަންދީ) ވާހަކަދައްކަވަމުން ރައީސް ޑރ. މުހައްމަދު މުއިއްޒުގެ ބޭފުޅުންނަށް އަމާޒުކޮށް ދެއްކެވި ވާހަކަތަކަކީ ދޮގު ވާހަކަތަކެއް ކަމަށާއި އެ މައްސަލާގައި މަންދީގެ މައްޗަށް ދައުވާ ކުރުމަށް ރައީސްގެ އާއިލާ އިން ނިންމަވައިފިއެވެ.

ރައީސްގެ ރަސްމީ ގެކޮޅު މ. ދިމްޔާތުގައި ރައީސްގެ އާއިލާގެ ފަރާތުން ވަނީ ނޫސްވެރިންގެ ބައްދަލުވުމެއް ބާއްވައިފައެވެ. އެ ބައްދަލުވުމުގައި ރައީސްގެ އަނބިކަނބަލުން ސާޖިދާ މުހައްމަދު ވަނީ ނޫސް ބަޔާނެއް އިއްވައިފައެވެ. އެ ބަޔާން މީޑިއާ އަށް އިއްވައި ދެއްވީ ކުރީގެ ބަންޑާރަ ނާއިބު އާއިޝަތު އާޒިމާ ޝުކޫރެވެ.

އެ ބަޔާނުގައި އެކަމަނާ ވިދާޅުވެފައި ވަނީ އެކުދިންގެ ނަމާއި ކަރާމަތް ނަގާލައި، ކުޑަކުއްޖަކަށް ވީތީ ލިބިފައިވާ ރައްކާތެރިކަން ނަގާލުމުން، އެކުދިންގެ މަންމަގެ ހައިސިއްޔަތުން ފިޔަވަޅުތަކެއް އެޅުމަށް ގަސްދު ކުރައްވާފައިވާ ކަމަށެވެ.

އެކަމަނާ ވިދާޅުވީ ދޮށީ ފިރިހެން ދަރިކަލުންނަކީ ދުވަހަކުވެސް ވޭޕް އަދި ދުންފަތުގެ އިސްތިއުމާލު ކުރި ކުއްޖެއް ނޫން ކަމަށެވެ. ދަރިކަލުންގެ އިސްތަށިފުޅުގައި އަޅުއްވަމުން ގެންދަވަނީ އެއްވެސް އަސްލެއް ނެތް ވާހަކަތަކެއް ކަމަށް ފަސްޓް ލޭޑީ ސާޖިދާ ވިދާޅުވިއެވެ.

"ރާއްޖެއިން ބައިވެރިވެފައިވާ މުޢާހަދާތަކުގެ ދަށުންވެސް ވަނީ ހައްގުތަކެއް ރައްކާތެރިކުރެވިފައި، އަދި އެ ކަންކަމާއި ހިލާފުވާ ފަރާތްތަކަށް ގާނޫނީގޮތުން ފިޔަވަޅު އެޅޭނެ،" އެ ބަޔާނުގައި ވިދާޅުވިއެވެ.

ރައީސްގެ އާއިލީ ގާނޫނީ ވަކީލު އާޒިމާ ވިދާޅުވީ އިދިކޮޅު އެމްޑީޕީން މަސައްކަތް ކުރަމުން އަންނަނީ އަދިވެސް އިތުރަށް ރައްޔިތުންގެ މެދުގައި އެކުދިންނާއި މެދު ނަފްރަތު އުފެއްދުމަށް ކަމަށެވެ. އެގޮތުން އެންމެ ތުއްޕުޅު ކުއްޖާގެ ފޮޓޯއާއެކު އަދިވެސް އެއްވެސް އަސްލެއް ނެތް ވާހަކަތައް ދައްކަމުން އަންނަ ކަމަށް ވިދާޅުވިއެވެ.

އާޒިމާ ވިދާޅުވީ އެ މައްސަލާގައި ދައުވާ ކުރުމަށް ނިންމީ މަންމައެއްގެ ހައިސިއްޔަތުން ކުދިންގެ ރައްކާތެރިކަމަށް އަޅާ ފިޔަވަޅެއްގެ ގޮތުން ކަމަށެވެ.