މިމަހުގެ ފުރަތަމަ ދެ ދުވަހަށްވުރެ އިއްޔެ މާލެ ސަރަހައްދުގައި ކަރަންޓު ބޭނުންކުރި އިތުރުވެފައިވާ ކަމަށް ސްޓެލްކޯގެ ތަފާސް ހިސާބުތަކުން ދައްކައިފިއެވެ.

ސްޓެލްކޯ އިން މިއަދު އާއްމު ކޮށްފައިވާ ގްރާފުން ދައްކާ ގޮތުގައި މި މަހުގެ ތިންވަނަ ދެވަނަ ދުވަހުންގެ ރޭގަނޑު 00:00 އިން ފެށިގެން ރޭ 23:00އާ ހަމައަށް މާލެ ސަރަހައްދުގައި ކަރަންޓު ބޭނުން ކޮށްފައިވާ ނިސްބަތް މިމަހުގެ ފުރަތަމަ ދެ ދުވަހަށްވުރެ އިތުރެވެ.

މިމަހުގެ ފުރަތަމަ ދުވަހު ރޭގަނޑު 00:00ގައި ކަރަންޓު ބޭނުންކޮށްފައި ވަނީ 68،176 މެގަވޮޓުގެ ކަރަންޓެވެ. މިމަހުގެ ދެވަނަ ދުވަހު އެ ވަގުތުގައި ބޭނުން ކޮށްފައި ވަނީ 63،039 މެގަވޮޓުގެ ކަރަންޓެވެ. ޖުމްލަ ގޮތެއްގައި ފާއިތުވެދިޔަ ދެ ދުވަހުވެސް ކަރަންޓު ބޭނުންކުރި މިންވަރު ދަށެވެ.

ރޯދަމަސް ފެށުނު ދުވަހާއި ޖެހިގެން އައި ދުވަހުގެ އިތުރުން އިއްޔެ ވެސް ރާއްޖެ އަށް މޫސުން ގޯހެވެ. ހާއްސަކޮށް ރޯދަމަސް ފެށުނު ދުވަހާއި ޖެހިގެން ދުވަހު މާލެ ސަރަހައްދަށް ބޯކޮށް ވަނީ ވާރޭ ވެހިފައެވެ. ނަމަވެސް އިއްޔެގެ ހަވީރުން ފެށިގެން މޫސުން ވަނީ ރަނގަޅުވެފައެވެ.

ސްޓެލްކޯ އިން މިއަދު ބުނީ މޫސުން ރަނގަޅުވާން ފެށުމުގެ އިތުރުން އޮފީސްތައް ހުޅުވުމާއެކު، ރޯދަ މަހުގެ ތިން ވަނަ ދުވަހު މާލެއާއި، ހުޅުމާލޭގައި ކަރަންޓު ބޭނުން ކުރި މިންވަރު ފުރަތަމަ ދެދުވަހާ އަޅާ ބަލާއިރު އިތުރުވެފައިވާ ކަމަށެވެ.

މި މަހުގެ ތިންވަނަ ދުވަހު 00:00 އިން ފެށިގެން ރޭގެ 23:00އާ ހަމަށް ކަރަންޓު ބޭނުން ކޮށްފައިވާ ނިސްބަތަށް ބަލާއިރު އެންމެ ގިނައިން އިއްޔެ ކަރަންޓު ބޭނުން ކޮށްފައި ވަނީ ރޭގަނޑު 22:00ގައެވެ. އެގޮތުން އެވަގުތުގައި 79،430 މެގަވޮޓުގެ ކަރަންޓު ބޭނުން ކޮށްފައިވެއެވެ.

އިއްޔެގެ ހެނދުނު 11:00 އިން ފެށިގެން ކަރަންޓު ބޭނުންކުރާ ނިސްބަތް އުޅުނީ 77،000 މެގަވޮޓަށްވުރެ މަތީގައެވެ.

ސަރުކާރުން ވަނީ މިއަހަރުވެސް ރަމަޟާން މަހުގެ ތެރޭގައި ބޭނުންކުރާ ކަރަންޓަށް ޑިސްކައުންޓު ދިނުމަށް ނިންމައިފައެވެ. ރަމަޟާން މަހު ކަރަންޓު ބިލުން ޑިސްކައުންޓު ދިނުމަށްޓަކައި، ރޯދަމަހު ވަކި ބިލެއް ދޭނެ ކަމަށް ސްޓެލްކޯ އިން ބުންޏެވެ.

އެންމެ ގިނައިން ކަރަންޓު ބޭނުން ކޮށްފައި ވަނީ ހަވީރުގެ ވަގުތުގައި ކަމަށް ސްޓެލްކޯ އިން މިއަދު ބުނެފިއެވެ.