މާލެ ސަރަހައްދުގައި އިއްޔެ އެންމެ ގިނައިން ކަރަންޓު ބޭނުން ކޮށްފައި ވަނީ ހަވީރުގެ ވަގުތުގައި ކަމަށް ސްޓެލްކޯ އިން މިއަދު ބުނެފިއެވެ.

ސްޓެލްކޯ އިން މިއަދު ވަނީ އިއްޔެގެ ވަގުތުތަކުގައި މާލެ ސިޓީގައި ކަރަންޓު ބޭނުން ކޮށްފައިވާ މިންވަރު އަންގައިދޭ ގްރާފެއް ސޯޝަލް މީޑިއާގައި ހިއްސާ ކޮށްފައެވެ. އެ ގްރާފުން ދައްކާ ގޮތުގައި އެންމެ ގިނައިން މާލެ ސިޓީގައި ކަރަންޓު ބޭނުން ކޮށްފައި ވަނީ ހަވީރު 16:00ގައެވެ.

އެވަގުތުގައި މާލެ ސިޓީން 78،029 ކިލޯވޮޓުގެ ކަރަންޓު ބޭނުން ކޮށްފައިވާ ކަމަށް ސްޓެލްކޯގެ ގްރާފުން ދައްކައެވެ. ހަވީރު 18:00އާ ހަމައަށް ކަރަންޓު ބޭނުންކުރި ނިސްބަތް ދުވަހުގެ އެހެން ވަގުތުތަކާއި އަޅާ ބަލާއިރު ގިނަކަން ފާހަގަކުރެވެއެވެ.

އެގޮތުން ހަވީރު 17:00ގައި 77،539 ކިލޯވޮޓުގެ ކަރަންޓު ބޭނުން ކޮށްފައިވެއެވެ. އަދި ހަވީރު 18:00ގައި 76،336 ކިލޯވޮޓުގެ ކަރަންޓު ބޭނުން ކޮށްފައިވާ ކަމަށް ސްޓެލްކޯގެ ގްރާފުން ދައްކައެވެ.

އެންމެ މަދުން ކަރަންޓު ބޭނުން ކޮށްފައި ވަނީ ހެނދުނު 7:00ގައެވެ. އެވަގުތުގައި ކަރަންޓު ބޭނުން ކޮށްފައި ވަނީ 55،474 ކިލޯވޮޓުގެ ކަރަންޓެވެ.

އިއްޔެ އަކީ ސްކޫލުތަކާއި އޮފީސްތައް ވެސް ބަންދު ދުވަހެކެވެ. ސްޓެލްކޯ އިން ބުނީ ކަރަންޓު ބޭނުން ކުރި މިންވަރު ވަރަށް ބޮޑުތަނުން ދަށަށްގޮސްފައިވާ ކަމަށެވެ. އެގޮތުން އެންމެ ޕީކްގައި 78 މެގަވޮޓް އިއްޔެ ބޭނުންކޮށްފައިވާއިރު، ރޯދަ މަހުގެ ކުރިން ޕީކް ގަޑީގައި ކަރަންޓު ބޭނުންކުރާ މިންވަރު އެވްރެޖްކޮށް ހުރީ 100 މެގަވޮޓް އިން މަތީގައި ކަމަށެވެ.

ސަރުކާރުން ވަނީ މިއަހަރުވެސް ރަމަޟާން މަހުގެ ތެރޭގައި ބޭނުންކުރާ ކަރަންޓަށް ޑިސްކައުންޓު ދިނުމަށް ނިންމައިފައެވެ. ރަމަޟާން މަހު ކަރަންޓު ބިލުން ޑިސްކައުންޓު ދިނުމަށްޓަކައި، ރޯދަމަހު ވަކި ބިލެއް ދޭނެ ކަމަށް ސްޓެލްކޯ އިން ބުންޏެވެ.