ކުރިޔަށް އޮތް ރަމަޟާން މަހު ދިވެހި ރައްޔިތުންނަށް ސަރުކާރުން ރޯދަ ހަދިޔާގެ ގޮތުގައި ދެމުން އަންނަ މަސްދަޅު ކޭސްތަކުގެ އަގު ކަރަންޓު ބިލާ ފެން ބިލަށް ލާނެ ކަމަށް ބުނެ ދައްކަމުން އަންނަ ވާހަކަތަކަށް ރައީސް ޑރ. މުހައްމަދު މުއިއްޒު ރައްދު ދެއްވައިފިއެވެ.

ދ. އަތޮޅުގެ ހުރިހާ ރަށަކަށް ކުރައްވާ ދަތުރުފުޅުގައި އެ އަތޮޅު ކުޑަހުވަދޫ އަށް ވަޑައިގެން އެރަށުގައި ބޭއްވި ޖަލްސާގައި ވާހަކަދައްކަވަމުން ރައީސް ވިދާޅުވީ މަސްދަޅު ކޭހުގެ ހަރަދުގެ ބަދަލަށް ކަރަންޓާއި ފެނުގެ ބިލްތައް ސަރުކާރުން ބޮޑު ކުރާނެ ކަމަށް ބުނެ އިދިކޮޅު ފަރާތްތަކުން ވާހަކަތައް ދަކަމުންދިޔަ ނަމަވެސް އެއީ އެއްވެސް ހަގީގަތެއް ނެތް ވާހަކަތަކެއް ކަމަށެވެ.

ރައީސް މުއިއްޒު ކުޑަހުވަދޫ އަށް ވަޑައިގެން އެރަށު ރައްޔިތުންނާ ބައްދަލުކުރައްވާ ވާހަކަދައްކަވަނީ: ފޮޓޯ | ރައީސް އޮފީސް

އޭގެ ބަދަލުގައި މިދިޔަ އަހަރުގެ ރޯދަމަހު ވެސް ކަރަންޓާއި ފެން ބިލުން ޑިސްކައުންޓު ދިން ފަދައިން މިއަހަރުވެސް ޔުޓިލިޓީ ބިލުތަކުން ޑިސްކައުންޓު ދެއްވާނެ ކަމަށް ރައީސް ވިދާޅުވިއެވެ.

"ކުރީ ރޯދަމަހު ދިން ގޮތަށް މި އަހަރުގެ ރޯދަމަހު ވެސް ފެނާއި ކަރަންޓު ބިލުން ޑިސްކައުންޓް ދޭނަން. އެކަން އެގޮތަށް ކުރިއަށް ދާނެ،" ރައީސް ވިދާޅުވިއެވެ.

ރައީސް މުއިއްޒު ކުޑަހުވަދޫ އަށް ވަޑައިގެން: ފޮޓޯ | ރައީސް އޮފީސް

ރައީސް މުއިއްޒު ދ. އަތޮޅުގެ ހުރިހާ ރަށަކަށް ކުރައްވާ ދަތުރުފުޅެއްގައި ފުރާވަޑައިގަތީ މިއަދު މެންދުރުފަހުގެ ވަގުތެއްގައެވެ.