ޓްރާންސްފޯމަރުން ވައްކަންކުރަން އުޅުނު މީހާއާއި ކުރިމަތިލި މުވައްޒަފަށް ސްޓެލްކޯގެ މެޑަލް އޮފް ބްރޭވަރީ އަރުވައިފިއެވެ.

މިއަދު ބޭއްވި ރަސްމިއްޔާތެއްގައި ސްޓެލްކޯގެ މެޑަލް އޮފް ބްރޭވަރީ އާއި އަގުވަޒަންކުރުމުގެ ހަނދާނީ ލިޔުން އަރުވާފައިވަނީ، މިމަހުގެ 14ވަނަ ދުވަހުގެ ރޭ ހުޅުމާލޭ ދެވަނަ ފިޔަވަހީގައި ހުރި ޓްރާންސްފޯމަރަކުން ވައްކަން ކުރަން އުޅުނު ދެމީހުން ހުއްޓުވައި އެމީހުން ކަމާބެހޭ ފަރާތްތަކާއި ޙަވާލުކުރުމުގައި އިސްކޮށް ހަރަކާތްތެރިވި، އަދި ވަގުން ދިން ހަމަލާގައި އަނިޔާވި ސްޓެލްކޯގެ މުވައްޒަފު، އަޙުމަދު ވިޝާންއަށެވެ.

މީގެ އިތުރުން ވިޝާން އާއިއެކު ޙާދިސާ ހިނގި ސަރަޙައްދުގައި ޙަރަކާތްތެރިވި ސްޓެލްކޯގެ އިތުރު މުވައްޒަފެއް ކަމަށްވާ ސަރުވާން މުޙައްމަދަށްވެސް ކުންފުނީގެ ފަރާތުން ވަނީ އަގުވަޒަންކުރުމުގެ ހަނދާނީ ލިޔުން އަރުވާފައެވެ.

މި ދެ މުވައްޒަފުންގެ އަގުވަޒަންކުރުމަށް ބޭއްވި ރަސްމިއްޔާތުގައި ވާހަކަފުޅު ދައްކަވަމުން ސްޓެލްކޯގެ މެނޭޖިން ޑިރެކްޓަރު ހުސައިން ފަހުމީ ވިދާލުވީ ސްޓެލްކޯއަކީ މުވައްޒަފުން ކުރާ މަސައްކަތުގެ އަގު އަބަދުވެސް އަދާކުރާ ކުންފުންޏެއް ކަމަށެވެ. އެ ކުންފުންޏަކީ މުވައްޒަފުންގެ އަގުވަޒަންކޮށް، މުވައްޒަފުންނަށް ދިމާވާ ކަންކަމުގައި އަޅާލާ، އޯގާތެރި މެނޭޖްމަންޓެއް އޮންނަ ކުންފުންޏެއް ކަމަށްވެސް ވިދާޅުވިއެވެ.

"އަޅުގަނޑު ތިބޭފުޅުންނަށް ޔަޤީންކަން މި އަރުވަނީ މިއަދުވެސް ކުންފުނީގެ މެނޭޖްމަންޓް އޮތީ ހަމަ އެގޮތަށޭ. ތިބޭފުޅުންނަށް ދިމާވާ ކޮންމެ ކަމެއްގަ އަޅުގަނޑުމެން ފަހަތުގަ ތިބޭނަން. އެކަމަކީ އަނިޔާއެއް ލިބުންކަމުގައިވިޔަސް، އުފަލެއް ލިބުންކަމުގައިވިޔަސް އަދި ހިތާމައެއް ލިބުންކަމުގައިވިޔަސް ކުންފުނީގެ މެނޭޖްމަންޓް އެކަމުގަ [މުވައްޒަފުންގެ] ފަހަތުގަ ތިބޭނެ. އެކަމުގަ [މުވައްޒަފުން ބޭނުންވާ] އެއްބާރުލުން އަޅުގަނޑުމެން ތިބޭފުޅުންނަށް ދޭނަން. އަޅުގަނޑު ޔަގީންކަން މި އަރުވަނީ، ތިބޭފުޅުން ރެއާ ދުވާލު ތި ކުރާ މަސައްކަތުގަ ލިބޭ ގެއްލުންތަކުގަ ކުންފުނީގެ މެނޭޖްމަންޓުން އެއްވެސްކަހަލަ އިހުމާލުވުމެއް ނޯންނާނެ،" ފަހުމީ ވިދާޅުވިއެވެ،

އެ ރަސްމިއްޔާތުގައި ވާހަކަފުޅުދައްކަވަމުން ސްޓެލްކޯގެ ޑެޕިއުޓީ މެނޭޖިން ޑިރެކްޓަރު ނާޒިރު ވިދާޅުވީ، އެ ކުންފުންޏަށް މިހާތަނަށް ލިބިފައިވާ ކޮންމެ ކާމިޔާބެއްގެ ފަހަތުގައި ވަނީ މުވައްޒަފުންނަށް ވަޒީފާގެ މާހައުލުގައި ލިބެންޖެހޭ ސަލާމަތާއި ރައްކާތެރިކަމާއި އިތުބާރާއި ހިތްހަމަޖެހުން ހޯދައިދެވިފައި އޮތުން ކަމަށެވެ.

"އަޅުގަނޑުމެން ކުންފުނީގެ އެންމެ ބޮޑު ރައުސުލްމާލަކީ މުވައްޒަފުން. މިއާމެދު ސުވާލެއް ނެތް. ޝައްކެއް ނެތް. ހަމައެގޮތަށް މަސައްކަތުގެ މާހައުލަކީ، ވަޒީފާގެ މާހައުލަކީ، މުވައްޒަފުންނަށް ސަލާމަތާ ރައްކަތެރިކަމާ ހިތްހަމަޖެހުން ލިބިފަ އޮންނާނެ ތަނަކަށް ވާނެޖެހޭނެކަމީ އެއީ އަޅުގަނޑުމެން އެންމެން ޤަބޫލުކުރާ ކަމެއް. އަދި އަޅުގަނޑުމެންނަށް މިއަދާހަމައަށް ލިބިފަ އޮތް ކާމިޔާބެގެ ފަހަތުގަވެސް އޮތީ، ކޮންމެ ކުރިއެރުމެއްގެ ފަހަތުގަވެސް އޮތީ، އަޅުގަނޑުމެންގެ މުވައްޒަފުންނަށް ވަޒީފާގެ މާހައުލުގަ ލިބެންޖެހޭ ސަލާމަތާ ރައްކާތެރިކަމާ، އިތުބާރާ ހިތްހަމަޖެހުން ހޯދައިދެވިފަ އޮތީމަ،" ނާޒިރު ވިދާޅުވިއެވެ.

ޓްރާންސްފޯމަރުން ވައްކަން ކުރަން އުޅުނު މީހުން އަތުލައިގަނެވިފައިވަނީ މިމަހުގެ 14ވަނަ ދުވަހުގެ ރޭ ހުޅުމާލޭގެ ދެވަނަ ފިޔަވަހީގެ ބައެއް ހިސާބުތަކުން ކަރަންޓުގެ ހިދުމަތް ކެނޑުމާއި ގުޅިގެން، ޓްރާންސްފޯމަރުތައް ޗެކުކުރުމުގެ މަސައްކަތް ކުރަމުންދަނިކޮށެވެ.