އަންނަ ހޮނިހިރު ދުވަހުން ފެށިގެން އައްޑޫ ސިޓީން ވެސް ޕާސްޕޯޓު ދޫކުރުމުގެ ހިދުމަތް ލިބޭނެ ކަމަށް މޯލްޑިވްސް އިމިގްރޭޝަނުން ބުނެފިއެވެ.

މިއީ މާލެ ފިޔަވައި ރާއްޖޭގެ އެހެން ސިޓީއަކުން މި ހިދުމަތް ލިބޭ ފުރަތަމަ ސިޓީއެވެ. މާލެ ސިޓީން ވެސް މިދިޔަ މަހުގެ ދެވަނަ ދުވަހުން ފެށިގެން، ހޮނިހިރު ދުވަހު ޕާސްޕޯޓު ދޫކުރުމުގެ ހިދުމަތް ދޭން ވަނީ ފަށައިފައެވެ.

މާލެ ސިޓީ ނެގުމަށްފަހު ރާއްޖޭގެ އެންމެ ބޮޑު އާބާދީއެއް އޮންނަ އައްޑޫ ސިޓީން މިމަހުގެ 8ވަނަ ދުވަހުން ފެށިގެން ކޮންމެ ހޮނިހިރަކު ޕާސްޕޯޓު ދޫކުރުމުގެ ހިދުމަތް ލިބޭނެ ކަމަށް އިމިގްރޭޝަނުން އެކްސްގައި ކޮށްފައިވާ ޕޯސްޓެއްގައި ބުނެފައިވެއެވެ.

ކޮންޓްރޯލާ އޮފް އިމިގްރޭޝަން ޝައްމާން ވަހީދު މީގެކުރިން ވިދާޅުވީ އެކަން ކުރުމުގެ މަގުސަދަކީ ރައީސުލްޖުމްހޫރިއްޔާ ޑރ. ⁦‪މުހައްމަދު މުއިއްޒު‬⁩ގެ އިރުޝާދާއި އެއްގޮތަށް، ހިދުމަތް ދޭ ވަގުތު އިތުރުކޮށް، ރައްޔިތުންނާ ގާތުން އަވަސް އަދި ލުއިފަސޭހަ ހިދުމަތެއް ފޯރުކޮށްދިނުން ކަމަށެވެ.

އިމިގްރޭޝަނުން އަންނަނީ ރާއްޖޭގެ އެހެން ރަށްރަށުން ވެސް ޕާސްޕޯޓު ހެދުމުގެ އިންތިޒާމުތައް ހަމަޖެއްސުމުގެ މަސައްކަތްތައް ކުރަމުންނެވެ. އެގޮތުން މިއަހަރުވެސް މީގެކުރިން ޕާސްޕޯޓު ހެދުމުގެ ހިދުމަތް ނުލިބޭ ގިނަ ރަށްތަކެއްގައި އެ ހިދުމަތް ދޭން ވަނީ ފަށައިފައެވެ.