ރިޔާސީ އިންތިހާބުގައި ދިވެހި ރައްޔިތުންނަށްވީ ވައުދުތައް ފުރިހަމައަށް ފުއްދައި ދޭނެ ކަމުގެ ޔަގީންކަން ރައީސް ޑރ. މުހައްމަދު މުއިއްޒު މިއަދު ދެއްވައިފިއެވެ.

ރ. އަތޮޅުގެ 11 ރަށަކަށް ކުރެއްވި ދަތުރުފުޅުގެ ތެރެއިން މިއަދު ރ. ވާދޫ އަށް ވަޑައިގެން ވާހަކަދައްކަވަމުން ރައީސް ވިދާޅުވީ، ރިޔާސީ އިންތިހާބުގެ ތެރޭގައިވެސް ރަށްތަކަށް ވަޑައިގެން ރަށްރަށުގެ ރައްޔިތުން ބޭނުންވާ ކަންކަން އޮޅުން ފިލުވާފައިވާނެ ކަމަށެވެ. އަދި އޭގެތެރެއިން ގިނަ ކަންތައްތަކެއް ކޮށްދެއްވާނެ ކަމަށް ވައުދުވެވަޑައިގެންފައި ވާނެ ކަމަށް އެމަނިކުފާނު ފާހަގަކުރެއްވިއެވެ.

"އާދެ... މި ދަތުރުގައި އަޅުގަނޑު ދޭން ބޭނުންވާ އެންމެ ބޮޑު ޔަގީންކަމަކީ އަޅުގަނޑު ރިޔާސީ އިންތިހާބުގައި ވީ ވައުދުތައް ފުރިހަމައަށް ފުރިހަމަ ކޮށްދޭނެ ކަމުގެ ޔަގީންކަން،" ރައީސް މުއިއްޒު ވިދާޅުވިއެވެ.

ރައީސް މުއިއްޒު ވާދޫ ސިފަ ކުރެއްވީ، އަމިއްލަ އިސްނެގުމުގެ މަތިން ބިނާކުރުވަނިވި ގޮތަކަށް ކަންކަން ކުރާ ރަށެއްގެ ގޮތުގައެވެ.

ރައީސް މުއިއްޒު ރ. ވާދޫއަށް ވަޑައިގަތުމުން އެރަށުގެ ކައުންސިލާ މުއައްސަސާތަކުގެ ވެރިންނާއެކު ބޭއްވި ބައްދަލުވުމުގެ ތެރެއިން --- ފޮޓޯ | ރައީސް އޮފީސް

"އެހެން ރަށްރަށަށްވުރެ ގިނައިން އިސްނަގައިގެން ކަންތައްތަކެއް ކުރާ ރަށެއްގެ ގޮތުގައި. ވަރަށް ޕޮޒިޓިވް ތިންކިންގެ ގޮތުގައި މަސައްކަތް ކުރާ ތަރައްގީގެ ވިސްނުމުގެ ރައްޔިތުންތަކެއްގެ ގޮތުގައި،" ރ. ވާދޫ ސިފަ ކުރައްވަމުން ރައީސް ވިދާޅުވިއެވެ.

ރައީސްގެ ވާހަކަފުޅުގައި ވާދޫއަށް ދިމާވެފައިވާ ގޯތީގެ މައްސަލަ ވީ އެންމެ އަވަހަކަށް ހައްލު ކޮށްދިނުމަށް މުއައްސަސާތަކުގެ ވެރިންނަށް އަންގަވާފައިވާނެ ކަމަށެވެ. ގޯތީގެ ކަންކަން ލަސްވެފައި ވަނީ ރަށުގެ ކުނި ގޮނޑު އޮތް ސަރަހައްދުގެ ގޮތުން ކަމަށް ވާތީ ކުނީގެ މައްސަލަ އަށް ވެސް ދާއިމީ ހައްލެއް ގެނެސްދެއްވާނެ ކަމަށް އެމަނިކުފާނު ވިދާޅުވިއެވެ.