ހިއުމަން ރައިޓްސް ކޮމިޝަން އޮފް ދަ މޯލްޑިވްސް (އެޗްއާރްސީއެމް)ގެ ނާއިބު ރައީސް ކަމުގެ މަގާމަށް މޫމިނާ ވަހީދު އައްޔަން ކުރެއްވުމަށް ރައްޔިތުން މަޖިލީހުގެ މިއަދުގެ ޖަލްސާ އިން ފާސްކޮށްފިއެވެ.

އެޗްއާރްސީއެމްގެ ނާއިބު ރައީސް ކަމުގެ މަގާމަށް މޫމިނާ އައްޔަން ކުރައްވާފައި ވަނީ ކުރިން އެ މަގާމުގައި ހުންނެވި އަދުހަމް އެޗްއާރްސީއެމްގެ މެންބަރު ކަމުގެ މަގާމުން އިސްތިއުފާ ދެއްވުމުންނެވެ.

އެ މަގާމަށް މޫމިނާ އައްޔަން ކުރެއްވީ މިއަދު ބޭއްވި ރައްޔިތުން މަޖިލީހުގެ ޖަލްސާގެ ވޯޓުގައި ބައިވެރިވެވަޑައިގެންނެވި މެންބަރުންގެ އިއްތިފާގުންނެވެ.

މޫމިނާ އެޗްއާރްސީއެމްގެ މެންބަރުކަމުގެ މަގާމަށް އައްޔަން ކުރެއްވީ 2020ވަނަ އަހަރުއެވެ.