ނިމިދިޔަ އެމްޑީޕީގެ ސަރުކާރުން ހުޅުމާލޭގެ ދެވަނަ ފިޔަވަހީގައި އިމާރާތް ކޮށްފައިވާ 4،000 ފްލެޓަށް އެދި ކުރިމަތިލާފައިވާ ފަރާތްތައް މާލޭގައި 15 އަހަރު ދިރިއުޅުނުކަން އަލުން ކަށަވަރު ކުރުމަށް ނިންމައިފިއެވެ.

ހުޅުމާލޭގެ ދެވަނަ ފިޔަވަހީގައި އިމާރާތް ކޮށްފައިވާ ދެ ކޮޓަރި އާއި ތިން ކޮޓަރީގެ ފްލެޓަށް 20،697 ފޯމު ހުށަހަޅާފައިވެއެވެ. އެއީ ދެ ކޮޓަރީގެ އެޕާޓުމަންޓަށް އެދި 6،208 ފޯމާއި ތިން ކޮޓަރީގެ އެޕާޓުމަންޓަށް އެދި 14،489 ފޯމެވެ. މި ފްލެޓުތަކުގެ ތެރޭގައި ހިމެނެނީ ދެ ކޮޓަރީގެ 1،250 ޔުނިޓާއި ތިން ކޮޓަރީގެ 2،750 ޔުނިޓެވެ.

މި ފްލެޓުތައް ލިބޭ ފަރާތްތަކުގެ ވަގުތީ ލިސްޓާއި އަދި ދާއިމީ ލިސްޓުވެސް އޮތީ އެމްޑީޕީގެ ސަރުކާރުގައި ނެރެފައެވެ. ވަގުތީ ނަމަވެސް 2023ވަނަ އަހަރުގެ ނޮވެމްބަރު މަހުގެ 16ވަނަ ދުވަހު އެންޓި ކޮރަޕްޝަން ކޮމިޝަން (އޭސީސީ) އިން ވަނީ ފްލެޓު ދިނުމުގެ ހުރިހާ ކަމެއް ހުއްޓާލުމަށް އަންގައިފައެވެ.

އޭގެފަހުން ވޭތުވެދިޔަ 14 މަސް ތެރޭގައި ފްލެޓު ލިބޭނެ ކަމަށް ލިސްޓުގައި ބަޔާން ކޮށްފައިވާ ފަރާތްތަކުން ވަނީ ފްލެޓުތައް ހަވާލު ނުކުރާތީ އެކަމުގެ ކަންބޮޑުވުން ފާޅުކޮށްފައެވެ. އަދި އެކި ފަހަރުތައް މަތިން އޭސީސީ އާއި ހައުސިން މިނިސްޓްރީ އަށް ގޮސް ކަންބޮޑުވުންތައް ހިއްސާ ކޮށްފައިވެއެވެ.

ރައީސް ޑރ. މުހައްމަދު މުއިއްޒުގެ ސަރުކާރު ހަވާލުވެ، ވެރިކަމަށް އަހަރަކަށްވުރެ ގިނަ ދުވަސް ވެގެން ދިޔައިރުވެސް ފްލެޓުތައް ހަވާލު ކޮށްފައި ނުވާތީ ސަރުކާރަށް އެކަމުގެ ފާޑު ކިޔުންތައް އަންނަނީ އަމާޒުވަމުންނެވެ. މީގެކުރިން ފްލެޓު ލިސްޓު އާއްމު ކުރުމަށް ދެ ތާރީހެއް ސަރުކާރުން ދިނެވެ. ނަމަވެސް އެއިން އެއްވެސް ތާރީހެއްގައި ފްލެޓު ލިސްޓު އާއްމު ކޮށްފައެއް ނުވެއެވެ.

މިދިޔަ ނޮވެމްބަރު މަހުގެ 16ވަނަ ދުވަހު ހައުސިން މިނިސްޓްރީން ވަނީ ފްލެޓު ލިސްޓު އިއުލާން ކުރުން މުއްދަތެއް ނެތް ގޮތަށް ފަސްކޮށްފައެވެ. ނަމަވެސް ސަރުކާރުން މިހާރު މަސައްކަތް ކުރަމުން އަންނަނީ އެ ލިސްޓު ކުރިޔަށް އޮތް ރޯދަ މަހުގެ ކުރިން ނެރުމަށެވެ.

އެކަމުގެ ތަފްސީލް ދިނުމަށް މިއަދު ރައީސް އޮފީހުގައި ބޭއްވި ނޫސްވެރިންގެ ބައްދަލުވުމެއްގައި ހައުސިން މިނިސްޓަރުގެ މަގާމުގައި މިހާރު ހުންނެވި ޑރ. މުއްތަލިބް ވަނީ އާ ސަރުކާރު ހަވާލުވެ ވޭތުވެދިޔަ 14 ވަރަކަށް މަސް ތެރޭގައި ވެސް ފްލެޓު ލިސްޓު ނެރެވިފައި ނުވާތީ އެކަމަށް މައާފަށް އެދިވަޑައިގެންފައެވެ.

މިނިސްޓަރު ވިދާޅުވީ ފްލެޓަށް އެދި ފޯމު ލާފައިވާ ހުރިހާ ފަރާތްތައް އަލުން އިވެލިއުއޭޓު ކުރުމުގެ ބަދަލުގައި، ކުރިން ގެޒެޓު ކޮށްފައިވާ ފްލެޓު ލިސްޓުގެ ވެރިފިކޭޝަން ޕްރޮސެސްއެއް ކުރިޔަށް ގެންދިއުމަށް ނިންމާފައިވާ ކަމަށެވެ. އެ ވެރިފިކޭޝަން ޕްރޮސެސް ކުރިޔަށް ގެންދާއިރު ބަލާނީ 26 ޖޫން 2022ގައި ފްލެޓަށް އެދި ހުށަހަޅާ ފަރާތްތަކުން މާލޭގައި ދިރިއުޅުނުކަން ސާބިތު ކުރުމަށް ހުށަހެޅިދާނެ ކަމަށް "ގެދޮރުވެރިޔާ ޕޯޓަލް"ގައި ބަޔާންކޮށްފައިވާ ކަންކަމުގެ މައްޗަށް ކަމަށްވެސް މިނިސްޓަރު ވިދާޅުވިއެވެ.

15 އަހަރު މާލޭގައި އުޅުނުކަން ކަށަވަރު ކޮށްދިނުމަށް ހުށަހެޅިދާނެ ކަމަށް ޕޯޓަލްގައި ބަޔާންކޮށްފައި ވަނީ ހަ ބާވަތެއްގެ ލިޔުމެކެވެ. އޭގެތެރޭގައި ފްލެޓަށް އެދޭ ފަރާތުން މާލޭގައި ވަޒީފާ އަދާކުރި ނުވަތަ އަދާކުރަމުން އަންނަ ތަންތަނުގެ ލިޔުމާއި ފްލެޓަށް އެދޭ ފަރާތުގެ އަނބިމީހާ ނުވަތަ ފިރިމީހާ ކައިވެންޏަށްފަހު ވޭތުވެދިޔަ 15 އަހަރު، މާލޭގައި ވަޒީފާ އަދާކުރި ނުވަތަ އަދާކުރަމުން އަންނަ ތަންތަނުގެ ލިޔުމާއި ފްލެޓަށް އެދޭ ފަރާތުން ވޭތުވެދިޔަ 15 އަހަރު މާލޭގެ ސްކޫލެއް ކޮލެޖެއް ނުވަތަ ޔުނިވާސިޓީއެއްގައި ކިޔެވިކަން ނުވަތަ ކިޔަވަމުންދާކަން އަންގައިދޭ ލިޔުން ހިމެނެއެވެ.

ފްލެޓަށް އެދޭ ފަރާތުގެ އަނބިމީހާ ނުވަތަ ފިރިމީހާ ވޭތުވެދިޔަ 15 އަހަރު މާލޭގެ ސްކޫލެއް ކޮލެޖެއް ނުވަތަ ޔުނިވާސިޓީއެއްގައި ކިޔެވިކަން ނުވަތަ ކިޔަވަމުންދާކަން އަންގައިދޭ ލިޔުމާއި ފްލެޓަށް އެދޭ ފަރާތުގެ ދަރިން ވޭތުވެދިޔަ 15 އަހަރު މާލޭގެ ސްކޫލެއް ކޮލެޖެއް ނުވަތަ ޔުނިވާސިޓީއެއްގައި ކިޔެވިކަން ނުވަތަ ކިޔަވަމުންދާކަން އަންގައިދޭ ލިޔުމުގެ އިތުރުން ފްލެޓަށް އެދި ހުށަހަޅާ ފަރާތުގެ ޕެންޝަނާ ގުޅޭ ލިޔުމަކީ 15 އަހަރު މާލޭގައި އުޅުނުކަން ކަށަވަރު ކޮށްދިނުމަށް ހުށަހެޅިދާނެ ކަމަށް ޕޯޓަލްގައި ބަޔާންކޮށްފައިވާ ލިޔުންތަކެވެ.

"ނަމަވެސް ބައެއް ފަރާތްތަކުން ސްކީމަށް އެޕްލައި ކުރިއިރުގައި ހުށަހެޅުމަށް އިއުލާންކޮށްފައިވާ ލިޔެކިއުންތަކާއި އިރުޝާދުތަކަށް ނުފެތޭ ލިޔުންތައް ހުށަހަޅާފައިވާކަން އޭސީސީން ވަނީ ފާހަގަކޮށްފައި،" މިނިސްޓަރު މުއްތަލިބު ވިދާޅުވިއެވެ.

އެފަދަ ލިޔުންތަކަކީ ބަލައިގަނެވޭނެ ލިޔުންތަކެއް ނޫން ކަމަށް އޮޑިޓާ ޖެނެރަލްވެސް ވިދާޅުވެފައިވާ ކަމަށާއި އެހެންކަމުން ސައްހަ ނޫން އެފަދަ އެއްވެސް ލިޔުމަކީ ގާނޫނީ ގޮތުން ބަލައިގަނެވޭނެ ލިޔުންތަކެއް ނޫން ކަމަށް މިނިސްޓަރު ވިދާޅުވިއެވެ. މާލޭގައި ދިރިއުޅުނުކަން ކަށަވަރު ކުރުމުގައި އެއް ހަމައެއް ގެންގުޅެފައި ނުވާކަން އޭސީސީގެ ތަހުގީގުގައި ވެސް ވަރަށް ބޮޑަށް ފާހަގަކޮށްފައިވާ ކަމަށް މިނިސްޓަރު ފާހަގަކުރެއްވިއެވެ.

"ލިސްޓުގެ ވެރިފިކޭޝަން ކުރިޔަށް ގެންދާއިރު އަޅުގަނޑުމެން ކަނޑައަޅާފައި ވާނީ މާލޭގައި ދިރިއުޅުނުކަމުގެ މުއްދަތަށް މެދުކެނޑުމެއް އައި ކަމަށް އެއް އަހަރު ދުވަހަށްވުރެ ދިގު މެދުކެނޑުމެއް އައުން،" މިނިސްޓަރު ވިދާޅުވިއެވެ.

މިނިސްޓަރު ވިދާޅުވީ ކުރީގެ ރައީސް ޔާމީންގެ ވެރިިކަމުގައި ކުރިޔަށް ގެންދިޔަ "ހިޔާ މަޝްރޫއު"ގެ ފްލެޓަށް ކުރިމަތިލާން ހުޅުވާލި އުސޫލުގައިވެސް މެދުކެނޑުމެއް ކަމަށް ބަޔާން ކޮށްފައި ވާނީ އެއް އަހަރު ދުވަހަށްވުރެ ދިގު މެދުކެނޑުމެއް އައުން ކަމަށެވެ.