މޫސުން ގޯސްވާނެ ކަމަށް ލަފާކޮށް މެޓު އޮފީހުން ނެރެފައިވާ އޮރެންޖު އެލާޓުގެ ވަގުތު، އިތުރު ފަސް ގަޑިއިރަށް ދަންމާލައިފިއެވެ.

މެޓުން އެންމެ ފުރަތަމަ އޮރެންޖު އެލާޓު ނެރެފައި ވަނީ މެންދުރުފަހު 15:00 އިން ފެށިގެން އިރުއޮއްސި 19:00ގެ ނިޔަލަށެވެ. އެ ވަގުތު އިތުރު ފަސް ގަޑިއިރަށް ވަނީ ދަންމާލައިފައެވެ.

މީގެ ކުޑަ އިރުކޮޅެއް ކުރިން މެޓުން ވަނީ 19:00 އިން ފެށިގެން މިރޭގެ 23:00އާ ހަމައަށް އޮރެންޖު އެލާޓު ނެރެފައެވެ. އެލާޓު ނެރެފައި ވަނީ ކުރިންވެސް އެ އެލާޓު ނެރެފައިވާ ސަރަހައްދުތަކަށެވެ.

އެއީ ބ، އަތޮޅުން ފެށިގެން ތ. އަތޮޅާ ދެމެދަށެވެ. އެ ދެމެދުގައި ހިމެނެނީ ބ. ޅ. ކ. އއ. އދ. ވ. މ. ފ. ދ. ތ. އަތޮޅެވެ. މެޓުން ބުނީ އެލާޓު ނެރެފައިވާ ވަގުތުގައި ބޯކޮށް ވާރޭވެހި ފެންބޮޑުވާނެ ކަމަށް ލަފާ ކުރެވޭ ކަމަށެވެ.

މިހާރު ކުރަމުން އަންނަ ބޯ ވިއްސާރާގައި މާލެ އަށް ގަޑިއިރެއްގެ ތެރޭގައި 60 މިލިމީޓަރުގެ ވާރޭ ވަނީ ވެހިފައެވެ.

"ޕީއެސްއެމް ނިއުސް" އަށް ދެއްވި އިންޓަވިއުއެއްގައި މޫސުމާ ބެހޭ ގައުމީ އިދާރާގެ އޮފިޝަލަކު ވިދާޅުވީ ވާރޭ ވެހެމުން އަންނަނީ ރިކޯޑު މިންވަރަކަށް ކަމަށެވެ. އެގޮތުން ވޭތުވެދިޔަ 24 ގަޑިއިރުގެ ތެރޭގައި މާލެ ސަރަހައްދަށް 140 މިލިލީޓަރުގެ ވާރޭ ވެހިފައިވާ ކަމަށް ވިދާޅުވިއެވެ.

އޭނާ ވިދާޅުވީ ކުރިޔަށް އޮތް ފަސް ވަރަކަށް ގަޑިއިރު ވެސް މިވަރަށް ވާރޭ ވެހޭނެ ކަމަށް ލަފާ ކުރެވޭ ކަމަށެވެ. އެހެންކަމުން މޫސުމަށް ސަމާލުކަން ދިނުމަށް ވަނީ އިލްތިމާސް ކުރައްވައިފައެވެ.