މިހާރު ކުރަމުން އަންނަ ބޯ ވިއްސާރާގައި މާލެ އަށް ގަޑިއިރެއްގެ ތެރޭގައި 60 މިލިމީޓަރުގެ ވާރޭ ވެހިއްޖެއެވެ.

"ޕީއެސްއެމް ނިއުސް" އަށް ދެއްވި އިންޓަވިއުއެއްގައި މޫސުމާ ބެހޭ ގައުމީ އިދާރާގެ އޮފިޝަލަކު ވިދާޅުވީ ވާރޭ ވެހެމުން އަންނަނީ ރިކޯޑު މިންވަރަކަށް ކަމަށެވެ. އެގޮތުން ވޭތުވެދިޔަ 24 ގަޑިއިރުގެ ތެރޭގައި މާލެ ސަރަހައްދަށް 140 މިލިލީޓަރުގެ ވާރޭ ވެހިފައިވާ ކަމަށް ވިދާޅުވިއެވެ.

އޭނާ ވިދާޅުވީ ކުރިޔަށް އޮތް ފަސް ވަރަކަށް ގަޑިއިރު ވެސް މިވަރަށް ވާރޭ ވެހޭނެ ކަމަށް ލަފާ ކުރެވޭ ކަމަށެވެ. އެހެންކަމުން މޫސުމަށް ސަމާލުކަން ދިނުމަށް ވަނީ އިލްތިމާސް ކުރައްވައިފައެވެ.

ރާއްޖެއަށް ކުރަމުންދާ ވިއްސާރައާ ގުޅިގެން ބޯކޮށް ވާރޭވެހި ފެންބޮޑުވެދާނެ ކަމަށް ބުނެ، 10 އަތޮޅަކަށް އޮރެންޖު އެލާޓު ވަނީ ނެރެފައެވެ.

މެޓް އޮފީހުން އޮރެންޖު އެލާޓް ނެރެފައި ވަނީ ނެރެފައި ވަނީ ބ، އަތޮޅުން ފެށިގެން ތ. އަތޮޅާ ދެމެދަށެވެ. އެ ދެމެދުގައި ހިމެނެނީ ބ. ޅ. ކ. އއ. އދ. ވ. މ. ފ. ދ. ތ. އަތޮޅެވެ.

މީގެ އިތުރުން ބޯކޮށް ވާރޭވެހި، ގުގުރުމާ އެކު 45 މޭލަށް ވައިގަދަވާނެ ކަމަށް ލަފާކޮށް، ލ. އަތޮޅު ހިމެނޭހެން 11 އަތޮޅަކަށް ލެޔޯ އެލާޓް ނެރެފައިވެއެވެ. އެއީ ބ. އަތޮޅުން ފެށިގެން ލ. އަތޮޅާ ހަމައަށެވެ.

މިދިޔަ އަންގާރަ ދުވަހުން ފެށިގެން މިއަދާ ހަމައަށް މޯލްޑިވްސް މީޓްރޮލޮޖިކަލްއިން ވަނީ މޫސުމަށް ސަލާމުވުމަށް 28 އެއާޓް ނެރެފައެވެ. އެގޮތުން 18 ވައިޓް އެލާޓާއި ނުވަ ޔެލޯ އެލާޓުގެ އިތުރުން 1 އޮރެންޖު އިންޒާރު ވަނީ ނެރެފައެވެ.