އިލެކްޓްރިކް ކާރު އުފައްދާ ޗައިނާގެ މަޝްހޫރު ބީ.ވައި.ޑީ ކުންފުންޏަށް ޗައިނާގެ މުވައްޒަފުން ބްރެޒިލްއަށް ގެންދިޔުމަށް ވަގުތީ ވިސާ ދޫކުރުން ބްރެޒިލްއިން މެދުކަނޑާލައިފިއެވެ.

ބްރެޒިލްއިން މި ފިޔަވަޅު އަޅާފައި މި ވަނީ ބްރެޒިލްގައި ހިންގާ ބީ.ވައި.ޑީ ކުންފުނީގެ ފެކްޓްރީއެއްގައި މަސައްކަތްކުރަން އެ ގައުމަށް ގެންދިޔަ ޗައިނާގެ މުވައްޒަފުންތަކެއް 'އަޅުންތަކެއް' ހެން ގެންގުޅެ، އެ މީހުން ލައްވައި މަސައްކަތްކުރުވި ކަމަށް ތުހުމަތުކުރެވޭ މައްސަލައެއްގައެވެ. ބްރެޒިލްގެ އިރު އުތުރުގައި އޮންނަ ބާހިއާ ސްޓޭޓްގައި ބީ.ވައި.ޑީ ކުންފުނީގެ ފެކްޓްރީއެއްގެ އެޅުމަށް ޖިންޖިއަންގ ގްރޫޕުން ގެނެސްފައިވާ ޗައިނާގެ 163 މީހެއްގެ މައްސަލަ ބްރެޒިލްގެ މަސައްކަތްތެރިންގެ ހައްގުތަކާ ބެހޭ އިދާރާތަކަށް ވަނީ ފާހަގަކުރެވިފައެވެ.

ވަގުތީ މަސައްކަތު ވިސާއެއްގައި ބްރެޒިލްއަށް އެތެރެ ކުރި އެ މީހުންނަކީ އިންސާނީ ވަގުފާރީގެ ޝިކާރަޔަކަށް ވެފައިވާ ބައެއް ކަމަށް ބްރެޒިލްގެ ކަމާ ބެހޭ ފަރާތްތަކުން ތުހުމަތުކުރެއެވެ. މި ފެކްޓްރީއަކީ ދެކުނު އެމެރިކާ ސަރަހައްދުގައި، އަދި ވަކިން ޚާއްސަކޮށް ބްރެޒިލްގައި ޗައިނާގެ ނުފޫޒު ވަރުގަދަވަމުންދާ ކަމުގެ ހެއްކެއްގެ ގޮތުގައި ގިނަ ބަޔަކު ފާހަގަކުރާ ތަނެކެވެ.

މި ފެކްޓްރީ އެޅުމަށް ބީ.ވައި.ޑީ ކުންފުނިން 620 މިލިއަން އެމެރިކާ ޑޮލަރު އިންވެސްޓްކުރެއެވެ. އަދި ބްރެޒިލްއަކީ ބީ.ވައި.ޑީ ކުންފުނީގެ ޗައިނާއިން ބޭރުގެ އެންމެ ބޮޑު މާކެޓެވެ. އަންނަ އަހަރުން ފެށިގެން މި ފެކްޓްރީ އޮޕަރޭޝަނަށް ގެނެސް، އަހަރަކު ދޮޅު ލައްކަ ކާރު އުފައްދަން ފަށާނެކަމަށް އެކުންފުނިން އިއުލާނުކޮށްފައިވެއެވެ.ބީ.ވައި.ޑީ އާއި ޖިންޖިއަންގ ގްރޫޕުން ވަނީ ބްރެޒިލްގެ ސަރުކާރުގެ ތުހުމަތުތައް ދޮގުކޮށްފައެވެ.