ސްރީލަންކާގެ ކުރީގެ ރައީސުންގެ ސެކިއުރިޓީ ބަލަހެއްޓުން ލަންކާގެ އަސްކަރިއްޔާއިން އިއްޔެ ހުއްޓާލައިފިއެވެ.

ލަންކާގެ ކުރީގެ ރައީސުންގެ ސެކިއުރިޓީ ދެން ބަލަހައްޓާނީ ފުލުހުން އެކަންޏެވެ.

އިއްޔެ އާއި ހަމަޔަށް ކުރީގެ ރައީސުންގެ ސެކިއުރިޓީ ބެލެހެއްޓުމުގައި ލަންކާގެ އެއްގަމު ސިފައިންނާއި، ކަނޑުގެ ސިފައިންނާއި، ވައިގެ ސިފައިންގެ ހިމެނޭ 'ޓްރައި-ފޯސަސް' ޓީމަކާއި ފުލުހުންގެ ޓީމެއް ހަރަކާތްތެރިވިއެވެ.

ކުރީގެ ރައީސުންނަށް ސިފައިން ދެމުންދިޔަ ސެކިއުރިޓީ ދިނުން ހުއްޓާލާނެކަން ޕަބްލިކް ސެކިއުރިޓީ މިނިސްޓަރ އާނަންދަ ވިޖެޕާލަ ވަނީ ކުރިން އިއުލާންކުރައްވާފައެވެ. ސިފައިންގެ ސެކިއުރިޓީ ހުއްޓާލަން ޖެހޭކަން ލަންކާގެ އަސްކަރިއްޔާގެ ތިން ގޮފީގެ ކޮމާންޑަރުންނަށް މިހާރު އަންގާފައިވާކަމަށް ލަންކާގެ ދިފާއީ ވުޒާރާއިން ވަނީ ބުނެފައެވެ.