ފޮރިން މިނިސްޓްރީގެ ސްޓޭޓް މިނިސްޓަރު އަދި ކުރީގެ ޕްރޮސިކިއުޓާ ޖެނެރަލް މުހުތާޒު މުހުސިން އެކްސްގައި ކުރެއްވި ޕޯސްޓަކާއި ގުޅިގެން އޭނާ އަށް މަރުގެ އިންޒާރު ދީފިއެވެ.

މުހުތާޒު ވަނީ ވިސާ ނެތި ތ. ވޭމަންޑޫގައި ދިރިއުޅޭ ފްރާންސް އާއިލާގެ މައްސަލައާ ގުޅިގެން އެކްސްގައި ޕޯސްޓެއް ކުރައްވައިފައެވެ. އެ ޕޯސްޓުގައި މުހުތާޒު ވަނީ އިމިގްރޭޝަން ގާނޫނު ރާއްޖޭގައި ހެދިފައި ވަނީ ދާހިލީ ހަމަޖެހުމާއި ދިވެހިންގެ މަސްލަހަތާއި ހަމަޖެހުމަށް އިސްކަން ދީގެން ކަމަށް ވިދާޅުވެފައެވެ.

"ދިވެހިރާއްޖޭގެ އިމިގްރޭޝަން ގާނޫނު ހެދިފައި ވަނީ މިގައުމުގެ ދާހިލީ ހަމަޖެހުމާއި ދިވެހީންގެ މަސްލަހަތާއި ހަމަޖެހުމަށް އިސްކަންދީގެން. ހިޖުރަވެރީންނަށް ރައްކާތެރިކަން ދިނުން އެގާނޫނުގައި ހުއްދަކުރެވިފައި ނުވޭ. ޖަޒުބާތީ ފިކުރުތަކާއި ދުރުވެ ގާނޫނީ ވެރިކަމަށް ޖާގަދިނުން ބުއްދިވެރި،" މުހުތާޒުގެ ޕޯސްޓުގައިވެއެވެ.

މުހުތާޒުގެ އެ ޕޯސްޓަށް ގިނަ ބަޔަކު ކޮމެންޓު ކޮށްފައިވާއިރު ކާކުން ނޭނގޭ ގޮތަށް ހަދާފައިވާ އެކްސް އެކައުންޓަކުން ވަނީ މުހުތާޒަށް މަރުގެ އިންޒާރު ދީފައެވެ. ހުތުރު ބަހުން ލިޔުމަށްފަހު އެ އެކައުންޓުން ވަނީ އިސް ކުރާނީ ހަތް އުޑުމަތިން ބާވާލެއްވި އިލާހީ ގާނޫނު ކަމަށް ބުނެފައެވެ.

"އެ ގާނޫނުގައި އޮންނަ ގޮތުން ވެއްޖިއްޔާ ކަލޭމެން ކަހަލަ ޖާހިލުން ކަރު ކަނޑަންވެސް ހުއްދަ. މިއީ އެއް އުއްމަތެއްކަން ހަނދާން ކުރާތި،" ޓޯނީ މޮންޓަނާ ނަމަކަށް ކިޔާ އެކައުންޓުން ކޮށްފައިވާ އެ ޕޯސްޓުގައިވެއެވެ.

އެ އެކައުންޓުން ކޮށްފައިވާ އިތުރު ޕޯސްޓެއްގައި ބުނީ މުހުތާޒު އެމީހުންގެ އަތްދަށުވެއްޖެ ނަމަ ލޭ އޮހޮރުވާލަން ވެސް ފަސް ނުޖެހޭނެ ކަމަށް ބުނެފައެވެ.

މި މައްސަލަ މުހުތާޒުގެ ފަރާތުން ފުލުހުންނަށް ހުށަހެޅި ކަމެއް ނުވަތަ ނޫން ކަމެއް އަދި ނޭނގެއެވެ.