ތިން މިނިސްޓްރީއަކާއި ސިޓީ ކައުންސިލްގެ ރަށްވެހިކަމުގެ އޮފީހުގައި އިއްޔެ ހިނގި އަލިފާނުގެ ހާދިސާއާ ގުޅިގެން، މުވައްޒަފުން މަސައްކަތް ކުރާތަން ބަދަލުވާންޖެހޭތީ، "ގެދޮރުވެރިޔާ" ސްކީމްގެ ދަށުން 4،000 ފްލެޓް މީހުންގެ ދާއިމީ ލިސްޓު އާންމުކުރުމަށް ކުޑަވަރެއްގެ ލަސްތަކެއް އައިސްދާނެ ކަމަށް ހައުސިންގ، ލޭންޑް އެންޑް އަރބަން ޑިވެލޮޕްމަންޓް މިނިސްޓަރު ޑރ. ޢަލީ ޙައިދަރު އަޙްމަދު ވިދާޅުވެއްޖެއެވެ.

"ހަތާވީސް"އަށް ދެއްވި އިންޓަވިއުއެއްގައި މިނިސްޓަރު މިރޭ ވިދާޅުވީ މިނިސްޓްރީގެ މަސައްކަތްތައް ދެން ފެށޭނީ ދަރުބާރުގޭގައި އިންތިޒާމުތައް ހަމަޖައްސައި ނިމުމުން ކަމަށާއި އެގޮތުން އާދީއްތަ ދުވަހު މަސައްކަތް ފެށޭނެ ކަމަށް އުންމީދު ކުރައްވާ ކަމަށެވެ.

"އަލިފާނާ ގުޅިގެން އޮފީސް ސެޓަޕް ބަދަލު ކުރަންޖެހޭތީ، އެ މަސައްކަތަށް ހުރިހާ ސްޓާފުން މަސްއޫލުވެގެން އުޅޭތީ، ލަސްކަމެއް އަންނަނީ. އެހެން ކަމެއް ނޫން. އެއީ މައުލުމާތެއް ގެއްލިގެނެއް ނޫން،" މިނިސްޓަރު ވިދާޅުވިއެވެ.

މިނިސްޓަރު ވިދާޅުވީ ގެދޮރުވެރިޔާ ސްކީމާ ގުޅޭ މައުލޫމާތަކީ ކްލައުޑްގައި ރައްކާކޮށްފައި ހުރި މައުލޫމާތުތަކެއް ކަމަށާއި އަލިފާނުގެ ހާދިސާއާ ގުޅިގެން އެ މައުލޫމާތުތަކަށް ނުރައްކަލެއް ނެތް ކަމަށެވެ.

ނަމަވެސް އޮފީހުގެ އިދާރީ ބޭނުމަށް ބޭނުންކުރަމުން ގެންދިޔަ ލިޔުންތަކާއި އޮފީހުގެ ސާވާގައި ހުރި ލިޔުންތަކަށް ނުރައްކާވެ، އަނދާފައިވާ ކަމަށެވެ. ނަމަވެސް ސާވާގެ ހާޑް ޑިސްކު ނަގައިގެން، ރިކަވާ ކުރެވޭތޯ މަސައްކަތް ކުރާނެ ކަމަށް މިނިސްޓަރު ވިދާޅުވިއެވެ.

"ސާވާއިން އަޅުގަނޑުމެންނަށް ހާޑް ޑިސްކު ރިކަވާކޮށްގެން، އޭގެ މައުލޫމާތުތަކެއް ލިބޭތޯ ނުލިބޭތޯ އެނގޭނީ ތަހުލީލުކޮށްގެން. އެހިސާބަށް ދިޔައީމަ އަޅުގަނޑުމެންނަށް މައުލޫމާތު ދެވޭނެ،" މިނިސްޓަރު ވިދާޅުވިއެވެ.

އިއްޔެ ހެނދުނު އަލިފާން ރޯވެ، އަނދާފައި ވަނީ ހައުސިންގ، ލޭންޑް އެންޑް އަރބަން ޑިވެލޮޕްމަންޓް މިނިސްޓްރީ އާއި ކޮންސްޓްރަކްޝަން އެންޑް އިންފްރާސްޓްރަކްޗަރ މިނިސްޓްރީ އާއި ކްލައިމެޓް ޗޭންޖް، އެންވަޔަރަންމަންޓް އެންޑް އެނަރޖީ މިނިސްޓްރީގެ އިތުރުން މާލެ ސިޓީގެ ރަށްވެހިކަމާ ގުޅޭ އޮފީހެވެ.

ހެނދުނު 6:27 އެހާކަންހާއިރު ރޯވި އަލިފާން ކޮންޓްރޯލް ނުކުރެވި މުޅި އިމާރާތް ވަނީ ބިމާހަމަވެފައެވެ. އަލިފާން ކޮންޓްރޯލް ކުރެވުނީ ހެނދުނު 9 ޖަހަން އުޅެނިކޮށެވެ.