ސީރިޔާގެ ސައިދާ ޒައިނަބްގައި ތާށިވެފައި ތިބި އިންޑިއާގެ 75 ބަޔަކު އެގައުމުން ނެރެވިފައިވާކަމަށް އިންޑިއާއިން ބުނެފިއެވެ.

އިންޑިއާގެ އެކްސްޓަރނަލް އެފެއަރޒް މިނިސްޓްރީއިން ބުނީ ސީރިޔާގައި މިހާރު ހިނގަމުންދާ ހަމަނުޖެހުންތަކުގައި ތާށިވި 75 އިންޑިއާ މީހުން ބޯޑަރު ހުރަސްކޮށް ރައްކާތެރި ހިސާބުތަކަށް ލުބްނާނަށް ގެންދެވިފައިވާކަމަށެވެ. މި އޮޕަރޭޝަން ހިންގާފައިވަނީ ސީރިޔާގެ ދިމިޝްގުގައި ހުންނަ އިންޑިއާ އެމްބަސީއާއި، ލުބްނާނުގެ ބެއިރޫތުގައި ހުންނަ އިންޑިއާ އެމްބަސީ ގުޅިގެންނެވެ.

އެ މީހުން ތިބި ސަރަހައްދުން ރައްކާތެރި ސަރަހައްދަކަށް ގެންދަން ޖެހުނީ އެމީހުންގެ އެދުމުގެ މަތިން، އެސަރަހައްދުގެ ސަލާމަތީ ހާލަތު ދަށަށް ދާތީ އެކަމަށް ރިއާޔަތްކުރުމަށްފަހު ކަމަށް އިންޑިއާ ސަރުކާރުން ބުނެއެވެ.ލުބްނާނަށް ގެންދެވުނު އެންމެންވެސް ކޮމަރޝަލް ފްލައިޓްތަކުގައި އިންޑިއާއަށް ދަތުރުކުރާނެއެވެ.

ރައްކާތެރި ހިސާބުތަކަށް ގެންދެވުނު އިންޑިއާ މީހުންގެ ތެރޭގައި އަޅުކަމަށް ސީރިޔާއަށް ގޮސް އުޅުނު ކަޝްމީރަށް ނިސްބަތްވާ 44 މީހަކުވެސް ހިމެނޭކަމަށް އިންޑިއާގެ އެކްސްޓަރނަލް އެފެއަރޒް މިނިސްޓްރީއިން ބުނެއެވެ.