ރާއްޖޭގެ އެންމެ ފުރަތަމަ ރައީސް ސުމުއްވުލް އަމީރު މުހައްމަދު އަމީން ދޮށިމޭނާ ކިލެގެފާނަށް ހެދިހެން އަދުގެ ރައީސުލްޖުމްހޫރިއްޔާ ޑރ. މުހައްމަދު މުއިއްޒަށް ވެސް ހަދަން ޖެހޭ ކަމަށް ބުނެ އިދިކޮޅު އެމްޑީޕީގެ މެންބަރުން ބުނަމުން އަންނާތީ އެކަން ކުށްވެރިކޮށް މަޖިލީހަށް ކުއްލި މައްސަލައެއް ހުށަހަޅައިފިއެވެ.

މިލަންދޫ ދާއިރާގެ މެންބަރު ހަސަން މުފީދު އަބްދުލްގާދިރު މަޖިލީހަށް ހުށަހެޅި ކުއްލި މައްސަލާގައި ބުނެފައި ވަނީ އެމްޑީޕީ އަށް ނިސްބަތްވާ އެކިއެކި ފަރާތްތަކުން ޕޯޑިއަމްތަކަށް އަރާ ވަޑައިގެން، ރައީސް މުއިއްޒަށް އަމީނަށް ހެދިހެން ހަދަން ޖެހޭ ކަމަށް ބުނަމުން އަންނަ ކަމަށެވެ. އަދި އެކަން ތަހުގީގީ އިދާރާތަކުން ބެލުމަށް އޭނާ ވަނީ ކުއްލި މައްސަލާގައި ގޮވާލައްވައިފައެވެ.

މިއަދު ރައީސްކަމުގައި ހުންނެވި ޑރ. މުއިއްޒަކީ ރިޔާސީ އިންތިހާބެއްގައި ބައިވެރިވެ، ދިވެހި ރައްޔިތުންގެ ތަނަވަސް އަގުލަބިއްޔަތުން އިންތިހާބު ކުރެއްވި ރައީސް ކަމަށާއި އަދި ވެރިކަން ނިމިދާނެ ފަދަ ހާލަތެއް ގާނޫނުއަސާސީގައި ސާފުކޮށް ބަޔާން ކޮށްފައިވާއިރު އެއާ ހިލާފަށް ރައީސް މުއިއްޒަށް ހަދަން ޖެހޭނީ އަމީނަށް ހެދި ގޮތް ކަމަށް ބުނެ، ޓެރަރިޒަމްގެ އަމަލު ކުރުމަށް ހިތްވަރު ލިބޭ ގޮތަށް އެމްޑީޕީގެ މެންބަރުން ވާހަކަދައްކަމުން އަންނަ ކަމަށް މުފީދު ހުށަހެޅުއްވި ކުއްލި މައްސަލާގައިވެއެވެ.

ސީދާ ގޮތުން ވިއަސް އަދި ނުސީދާ ގޮތުން ވިއަސް ޓެރަރިޒަމްގެ އަމަލެއް ކުރުމަށް ހިތްވަރު ދިނުމަކީ ކުށެއް ކަމަށް ގާނޫނުގައި ބަޔާން ކޮށްފައިވާ ކަމަށް މުފީދު ވިދާޅުވިއެވެ.

މުފީދު ހުށަހެޅުއްވި ކުއްލި މައްސަލަ ބަލައިގަނެ މިއަދުގެ މަޖިލިސް ޖަލްސާގައި ވަނީ ބަހުސް ފަށައިފައެވެ.

މުފީދު މިފަދަ މައްސަލައެއް މަޖިލީހަށް ހުށަހަޅާފައި މިވަނީ ހދ. ކުޅުދުއްފުށީ ސިޓީގައި ބޭއްވި އެމްޑީޕީގެ ޖަލްސާއެއްގައި ވާހަކަދެއްކި އެޕާޓީގެ އެކްޓިވިސްޓަކު ވާހަކަދައްކަމުން، ރައީސް ޑރ. މުހައްމަދު މުއިއްޒަށް ރާއްޖޭގެ އެންމެ ފުރަތަމަ ރައީސް ސުމުއްވުލް އަމީރު މުހައްމަދު އަމީން ދޮށިމޭނާ ކިލެގެފާނަށް ހެދިހެން ހަދަން ޖެހޭ ކަމަށް ބުނެ ދެއްކި ވާހަކަ ދިފާއުކޮށް، އެމްޑީޕީގެ ޗެއާޕާސަން ފައްޔާޒު އިސްމާއީލް ވާހަކަދައްކަވާފައި ވަނިކޮށެވެ.