މޯލްޑިވްސް މީޑިއާ ކައުންސިލް (އެމްއެމްސީ)ގެ 8 ވަނަ ދައުރަށް 10 މެމްބަރަކު އިންތިހާބުކޮށްފިއެވެ.

މީގެ 16 އަހަރު ކުރިން ފެށިގެން އަމަލު ކުރަމުންދާ މީޑިއާ ކައުންސިލްގެ ގާނޫނުގެ ދަށުން، އެ ކައުންސިލަށް 10 މެމްބަރަކު އިންތިހާބު ކުރުމުގެ ސިއްރު ވޯޓު ނެގުން އޮތީ މިއަދު މެންދުރު ސޯޝަލް ސެންޓަރުގައެވެ. ރާއްޖޭގައި ހިންގާ ނޫސް މީޑިއާތަކާއި ބްރޯޑްކާސްޓަރުން ހިމެނޭ ގޮތަށް 148 މީޑިއާއަކުން އެ އިންތިހާބުގައި ވޯޓުލުމަށް ރަޖިސްޓްރީ ކުރިއެވެ.

މީޑިއާތަކުން އިންތިހާބުވި މެންބަރުން

  1. ފާތިމަތު ޝަނާ މުހައްމަދު - މިހާރު
  2. ނަޖާހު މަސްއޫދު - ވަގުތު އޮންލައިން
  3. ހުސައިން ހަސަން - ހަތާވީސް އޮންލައިން
  4. ނަހުދާ ފާއިޒު - ދިޔަރެސް
  5. ހަސަން ޝާކިރު - އާފަތިސް
  6. ހަފްސީ - ހަފްސީ ޑޮޓް ކޮމް
  7. ހުސައިން ޝަގީފު - ތިލަދުން

އާންމުންގެ ތެރެއިން އިންތިހާބު މެންބަރުން

  1. ފާތިމަތު ފަހުމީ، ސީނަރީ ގދ. މަޑަވެލި
  2. އިބްރާހިމް ފައުޒީ، ހުޅުމާލެ، ފްލެޓް ނަންބަރު 04-1-73
  3. އިބްރާހީމް މުހައްމަދު، ގ. ވިންޑް، މާލެ

އިންތިހާބު ބޭއްވުމުގެ އިންތިޒާމުތަކާއި އިދާރީ ކަންކަން ކުރިއަށް ގެންދިޔައީ ޔޫތު މިނިސްޓަރު އިބްރާހިމް ވަހީދު ނެންގެވި ފަސް މެމްބަރުންގެ ކޮމިޓީއަކުންނެވެ. އެ އިންތިހާބު މޯލްޑިވްސް ޖާނަލިސްޓް އެސޯސިއޭޝަން (އެމްޖޭއޭ)އިން މޮނީޓާކުރިއެވެ.

އެމްއެމްސީ އިންތިހާބު ބާއްވާފައި ވަނީ ވޯޓާސް ލިސްޓަށް ބަދަލުތަކެއް ގެނައި ކަމަށް ބުނެ، ކެންޑިޑޭޓުންތަކެއް ޝަކުވާ ހުށަހަޅާފައި ވަނިކޮށެވެ.

މޯލްޑިވްސް މީޑިއާ ކައުންސިލް އެކުލެވިގެންވަނީ 15 މެމްބަރުންގެ މައްޗަށެވެ. އެއީ އާންމުންގެ ހަތް މެމްބަރުންނާއި މީޑިއާތަކުގެ އަށް މެމްބަރުންނެވެ. ދައުރު ފުރިހަމަ ނުވެ، ފަސް މެމްބަރަކު ކައުންސިލްގައި މިވަގުތު އެބަ ތިއްބެވެ.

މޯލްޑިވްސް މީޑިއާ ކައުންސިލަކީ މީޑިއާގެ މިނިވަންކަން ރާއްޖޭގައި ދެމެހެއްޓުމާއި އެ މިނިވަންކަމަށް އުނިކަން އަންނަ ކަންކަން ބަލައި ފިޔަވަޅު އެޅުމަށް އުފައްދާފައިވާ މިނިވަން މުއައްސަސާއެކެވެ. އަދި މީޑިއާގައި މަސައްކަތް ކުރާ ފަރާތްތަކުން އަމަލުކުރަންވީ ހަމަތަކާއި އެ ފަރާތްތަކުގެ އަހްލާގީ މިންގަނޑުތައް އެކަށައެޅުމާއި މީޑިއާގައި މސައްކަތް ކުރާ ފަރާތްތަކާއި ހިދުމަތް ދޭ ދާއިރާތަކުން މަސައްކަތް ކުރަނީ ޒިންމާދާރު ގޮތެއްގައި އަހްލާގީ މިންގަނޑުގެ ތެރޭގައިކަން ކަށަވަރު ކުރުމަކީ އެ ކައުންސިލްގެ މަގުސަދުތަކުގެ ތެރޭގައި ހިމެނޭ ކަމެކެވެ.