ކުރިއަށް އޮތް އިންތިޚާބުތަކަށް ތައްޔާރުވުމަށާއި ޕާޓީގެ ހަރަކާތްތައް އިތުރުކޮށް، މެމްބަރުންނާއި ބައްދަލުކުރެއްވުމަށް އެމްޑީޕީގެ ރައީސް އަބްދުﷲ ޝާހިދު އިސްވެ ހުންނަވާ އެ ޕާޓީން ދަތުރުތަކެއް ފަށައިފިއެވެ.

ޝާހިދާ އެކު، އެ ޕާޓީގެ އިސް ބައެއް ބޭފުޅުން މި ކެމްޕެއިންގައި އެންމެ ފުރަތަމަ ވަޑައިގެންނެވީ ތޮއްޑޫ ދާއިރާގެ ތިން ރަށަކަށެވެ. މިދިޔަ ހޯމަ ދުވަހު ފެށި ދަތުރުގައި އުކުޅަހަށާއި ރަސްދޫގެ އިތުރުން ތޮއްޑޫއަށް އެމްޑީޕީގެ ޓީމުން ވަޑައިގެންނެވިއެވެ.

އއ. އުކުޅަހު އެމްޑީޕީ މެމްބަރުންނާ ވާހަކަ ދައްކަވަމުން ޝާހިދު ވިދާޅުވީ އެމްޑީޕީގެ ސަފުތައް ރުކުރުވާލައި، 2026 ވަނަ އަހަރު އޮންނަ ކައުންސިލް އިންތިހާބު ކާމިޔާބު ކުރަންޖެހޭ ކަމަށެވެ. އަދި ވިދާޅުވީ ސަރުކާރުން ގެންދަނީ ދޮގު ހަދައި، ރައްޔިތުންނަށް އޮޅުވާލަމުން ކަމަށާއި ކައުންސިލްތަކުގެ ބާރު މާލެއަށް ޖަމާކުރަން ފަށާފައިވާ ކަމަށެވެ. އެގޮތުން ރަށްރަށުގައި ހިންގާ ޕީއެންސީގެ ކޮމެޓީއެއް މެދުވެރިކޮށް، ރަށްރަށުގެ ތަރައްގީގެ މަސައްކަތްތައް ކުރުމަށް ރައީސް ޑރ. މުހައްމަދު މުއިއްޒުގެ ސަރުކާރުން މަސައްކަތް ކުރަމުންދާ ކަމަށާއި އެކަމަކީ ކައުންސިލްތަކުގެ ބާރު ކަނޑުވާލަން ކުރާ ކަމެއް ކަމަށް ޝާހިދު ވިދާޅުވިއެވެ.

އުކުޅަހު އެމްޑީޕީ މެމްބަރުންނާ ބައްދަލު ކުރައްވައި، ވާހަކަ ދައްކަވަމުން އެމްޑީޕީ ޕާލަމެންޓްރީ ގްރޫޕުގެ ލީޑަރު އިބްރާހިމް ނާޒިލް ވިދާޅުވީ ކައުންސިލްތައް ސައިޒު ކުރާނެ ކަމަށް ރައީސް މުއިއްޒު ވިދާޅުވެފައިވާ ކަމަށާއި މި ސަރުކާރުން އުޅެނީ އެމްޑީޕީ ސަރުކާރުން ކައުންސިލްތަކަށް ދިން ބާރުތައް "އެޓޯލް މިނިސްޓްރީއަށް" ޖަމާކުރުމަށް ކަމަށެވެ.

"2026ގެ އިންތިހާބޭ އެންމެ ބޮޑަށް ފޯކަސްކޮށްގެން ކުރަންވީ. މިދަނޑިވަޅުގައި މިއީ އެވަގުތޭ. މިވަގުތު އެކަން ނުކުރެވި އަޅުގަނޑުމެންގެ އަތުން 2026 ގޮސްފިކަަމަށް ވަންޏާމު، ދައްކާނެ އިތުރު ވާހަކައެއް ނެތް،" ނާޒިލް ވިދާޅުވިއެވެ.

ޝާހިދާއި ނާޒިލުގެ އިތުރުން މަޖިލީހުގެ ބައެއް މެމްބަރުންނާއި ގައުމީ މަޖިލީހުގެ މެމްބަރުންނާ ބައިވެރިވި އެ ދަތުރުގައި އުކުޅަހާއި ރަސްދު އާއި ތޮއްޑޫގެ އެމްޑީޕީ އާންމު މެމްބަރުންނާ ބައްދަލުކޮށް، އެމްޑީޕީގެ މަސައްކަތްތައް އަލުން ފެށުމާ ގުޅޭގޮތުން މަޝްވަރާކުރެއްވިއެވެ.