ތޮއްޑޫގެ މަޝްހޫރު ކްލަބުތަކުގެ އިސް ބޭފުޅުން އެމްޑީޕީއަށް

އއ. ތޮއްޑޫގެ ސޯސަން ކްލަބާއި ބްރައިޓް ކްލަބުގެ އިސް ފަރާތްތައް އިދިކޮޅު އެންމެ ބޮޑު ޕާޓީ، އެމްޑީޕީއާ ރޭ ގުޅިވަޑައިގެންފިއެވެ.

މި ބޭފުޅުން އެމްޑީޕީއާ ގުޅިވަޑައިގެންނެވީ އެމްޑީޕީގެ ރައީސް އއ. އަތޮޅަށް ކުރައްވާ ދަތުރުފުޅުގައި ތޮއްޑޫއަށް ވަޑައިގެން، އެ ރަށުގައި ބޭއްވި ރަސްމިއްޔާތެއްގައެވެ.

އެމްޑީޕީއާ ރޭ ގުޅިވަޑައިގެންނެވީ ސޯސަން ކްލަބްގެ ރައީސް އާދަމް މުނާޒް އާއި ނައިބު ރައީސް އާދަމް ނިޝާހު އާއި ތޮއްޑޫ ބްރައިޓް ކްލަބްގެ ނައިބު ރައީސް އަހްމަދު ފާއިގް އާއި ތޮއްޑޫގައި ލޯކަލް ޓޫރިޒަމްގެ ވިޔަފާރީގައި އިސްކޮށް ހަރަކާތްތެތިވާ މޫސާ މަޖްދީގެ ދެކަނބަލުންނެވެ.

ތޮއްޑޫ ސޯސަން ކްލަބުގެ ނައިބު ރައީސް އާދަމް ނިޝާހުއަކީ ޕީޕީއެމްގެ ސްޓިއަރިން ކޮމެޓީގެ ނައިބު ރައީސްކަން ވެސް ކުރިން ކުރެއްވި ބޭފުޅެކެވެ.

އެ ބޭފުޅުން އެމްޑީޕީއާ ގުޅިވަޑައިގެންނެވި ރަސްމިއްޔާތަށް އެ ޕާޓީގެ ރައީސް ޝާހިދު ވިދާޅުވީ އެމްޑީޕީގެ ހަޔާތުގައި ރެ އަކީ ތޮއްޑޫއަށް ވަރަށް ހާއްސަ ރެއެއް ކަމަށާއި ފެނިގެންދަނީ އެމްޑީޕީގެ ހަރަކާތްތައް "ގަދައަށް" އެ ރަށުގައި ރުކުރުވާލެވޭތަން ކަމަށެވެ.

"އަޅުގަނޑުމެންނަށް މި ފެންނަނީ މިއަދުގެ ސަރުކާރުގެ އަނިޔާވެރިކަމުގެ ކުރިމަތީގައި މި ތޮއްޑޫގެ ރައްޔިތުން ނޫނެކޭ ބުނަން އެމްޑީޕީއާ ގުޅިގެން ތެދުވާތަން. މި އެއް އަހަރު ދުވަހުގެ ތެރޭގައި ދިވެހި ރައްޔިތުންނަށް މިއަދުގެ ސަރުކާރުން ކުރަމުން ގެންދިޔަ އަނިޔާތައް ދުއްތުރާ، ޖެއްސުން، އެއީ ނޫނެކޭ ބުނެ، ތެދުވާތަން،" ޝާހިދު ވިދާޅުވިއެވެ.

އއ. އަތޮޅަށް ޝާހިދު ކުރައްވާ ދަތުރުފުޅު ފެއްޓެވީ މިދިޔަ ހޯމަ ދުވަހު އއ. އުކުޅަހުންނެވެ. އެމަނިކުފާނު އިއްޔެ ވަނީ އއ. ރަސްދޫއަށް ވެސް ވަޑައިގެންފައެވެ.

ޝާހިދުގެ މި ދަތުރުފުޅަކީ 2026 ވަނަ އަހަރު އޮންނަ ލޯކަލް ކައުންސިލް އިންތިހާބަށް އެމްޑީޕީ ތައްޔާރުވުމަށް ކުރައްވާ ދަތުރުފުޅުތަކެކެވެ.