އެމްއެންޑީއެފާއި އިންޑިއާ އަސްކަރިއްޔާ ގުޅިގެން އަހަރަކު އެއްފަހަރު ބާއްވަމުން އަންނަ "އެކްސަސައިޒް އެކަތަ" ގެ 7 ވަނަ ސިލްސިލާ، ކާމިޔާބުކަމާއެކު ނިންމާލައިފިއެވެ.

މި އެކްސަސައިޒް ނިންމުމުގެ ގޮތުން ޅ. މާފިލާފުށީގައި ހުންނަ ކޮމްޕޮސިޓް ޓްރެއިނިން ސެންޓަރުގައި އިއްޔެ ބޭއްވި ރަސްމިއްޔާތު ޝަރަފުވެރިކޮށްދެއްވީ ޗީފް އޮފް ޑިފެންސް ފޯސް، މޭޖާ ޖެނެރަލް އިބްރާހީމް ހިލްމީއެވެ.

މިދިޔަ އޮކްޓޫބަރު 28އިން ނޮވެންބަރު 23ވަނަ ދުވަހުގެ ނިޔަލަށް ހިންގި އެކްސަސައިޒްގައި އިންޑިއަން ނޭވީ، މެރިން ކޮމާންޑޯއާއި އެމްއެންޑީއެފް މެރިން ކޯ، ސްޕެޝަލް އޮޕަރޭޝަންސް ގުރޫޕްގެ އޮޕަރޭޓިވްސް ބައިވެރިވިއެވެ. އެ ތަމްރީނުތަކުގައި މައިގަނޑު ގޮތެއްގައި ފަރިތަކޮށްފައި ވަނީ ޓެކްޓިކަލް ޑައިވިން، ފަޔަރިން، ސްލިދަރިން އަދި ބޯޑިން ހުނަރުތަކެވެ.

މި ތަމްރީނުގައި އިންޑިއާގެ ކޮޗިންގެ ޑައިވިން ސްކޫލާއި ގޯއާގެ ނޭވަލް ސްޕެޝަލް ވޯފެއާ ޓްރެއިނިން އެންޑް ޓެކްޓިކަލް ސެންޓަރު (އެންއެސްޑަބްލިއުޓީޓީސީ) އިން 02 އޮފިސަރުންނާއި 08 ފަޅުވެރިން ހިމެނޭ ގޮތަށް 10 ސިފައިންގެ މައްޗަށް އެކުލެވޭ އިންޑިއަން ނޭވީ މޮބައިލް ޓްރެއިނިން ޓީމެއް ބައިވެރިވިއެވެ. މި އެކްސަސައިޒްގައި އެމްއެންޑީއެފް ސްޕެޝަލް އޮޕަރޭޝަންސް ގްރޫޕްގެ 18 ތަމްރީނުވެރިން ބައިވެރިވެފައިވެއެވެ.

މި ތަމްރީނުގައި ހަތިޔާރު ނެތް ހަނގުރާމަތަކާއި ބެޓަން ޓެކްނިކްސް ފަދަ ތަމްރީނުތައް ކުރިޔަށް ގެންގޮސްފައިވެއެވެ. މި ތަމްރީނުތަކުގެ ތެރޭގައި ފިޒިކަލް ޓްރެއިނިން އާއި ޓެކްޓިކަލް ޕްރޮސީޖާސް އާއި އެސޯލްޓް ވެޕަން ފަޔަރިން ސްނައިޕާ ފަޔަރިން އަދި އައިލެންޑް ޓެރިޓަރީތަކާއި މެރިޓައިމް ސްޕޭސް ބޭނުންކޮށްގެން ކުރިމަތިވެދާނެ ނުރައްކާތައް ނިއުޓްރަލައިޒް ކުރުމަށް ފުޅާ ދާއިރާއެއްގައި މަސައްކަތް ކޮށްފައިވެއެވެ. އިކުއިޕްމަންޓާއި ހަތިޔާރު ހިމެނޭ ގޮތަށް އެސޯސިއޭޓެޑް ޓްރެއިނިން ގިޔަރު ގެންދިޔައީ އިންޑިއަން ނޭވީ މޮބައިލް ޓްރެއިނިން ޓީމުންނެވެ.

"އެކްސަސައިޒް އެކަތަ" ގެ 7 ވަނަ ސިލްސިލާ، ނިންމުމުގެ ރަސްމިއްޔާތުގައި އިންޑިއާއިން ރާއްޖެއަށް ކަނޑައަޅުއްވާފައި ހުންނަވާ ސަފީރު، ހިޒް އެކްސެލެންސީ މުނު މަހާވަރްއާއި، އެމްއެންޑީއެފް ނޮދަން އޭރިއާ ކޮމާންޑުގެ ކޮމާންޑަރު، ބްރިގޭޑިއާ ޖެނެރަލް އިސްމާއީލް ޝަރީފް އަދި އެމްއެންޑީއެފް ދަ ބޭސިކް ސްކޫލުގެ އޮފިސަރުން ބައިވެރިވެލެއްވިއެވެ.

ޅ. މާފިލާފުއްޓަކީ ދިވެހި ސިފައިން ތަމްރީނުތައް ހަދަމުން އަންނަ މައި މަރުކަޒެވެ. މާފިލާފުށީގައި ސީޓީސީ އެޅުމުގެ މަސައްކަތަށް އިންޑިއާ ސަރުކާރުން 5.93 މިލިއަން ޑޮލަރު ހަރަދުކުރި އިރު، އެ މަސައްކަތް ނިންމާލާފައި ވަނީ 2016 ވަނަ އަހަރުގެ މެއި މަހުއެވެ.