އަންނަ އަހަރަށް ލަފާކޮށް ސަރުކާރުގެ ފަރާތުން ހުށަހަޅާފައިވާ ބަޖެޓަކީ "ތަންދޮރު" އެނގޭ ބަޖެޓެއް ނޫން ކަމަށް ވިދާޅުވެ، އެ ބަޖެޓު އަނބުރާ ފޮނުވާލުމަށް މަޝްހޫރު ވިޔަފާރިވެރިޔާ އަދި މީދޫ ދާއިރާގެ މެންބަރު އަހްމަދު ސިޔާމް (ސަންޓްރެވަލް ސިޔާމް) ގޮވާލައްވައިފިއެވެ.

ރައްޔިތުން މަޖިލީހުގެ މިއަދުގެ ޖަލްސާގައި ބަޖެޓަށް ބަހުސް ކުރައްވަމުން ސިޔާމް ވަނީ މިއީ ބަރުލަމާނީ ހަޔާތުގައި ބަޖެޓުގެ ތަފްސީލު ނެތް ފުރަތަމަ ފަހަރު ކަމަށް ވިދާޅުވެ، ބަޖެޓަށް ފާޑު ވިދާޅުވެފައެވެ. ބަޖެޓުގައި ހުރީ ވަކިވަކި ދާއިރާތަކަކަށް އަދަދުތަކެއް ކަނޑައަޅާފައި ކަމަށާއި އެ ދާއިރާތަކަށް ކަނޑައަޅާފައިވާ ފައިސާ އިން ކުރާނެ ހަރަދުތަކުގެ އެއްވެސް ތަފްސީލެއް ނެތް ކަމަށް އޭނާ ވިދާޅުވިއެވެ.

ސިޔާމް ވިދާޅުވީ ބަޖެޓެއް ހުށަހަޅާއިރު ތަފްސީލު އެނގެން ޖެހޭނެ ކަމަށެވެ. ދާއިރާތަކަށް ކުރާ ހަރަދުތަކާއި ކުރާ ކަންކަން އެނގެން ޖެހޭނެ ކަމަށް އޭނާ ވިދާޅުވިއެވެ.

"މިއީ އަޅުގަނޑުގެ މަޖިލީހުގެ އުމުރުން ފުރަތަމަ ފަހަރު ތަފްސީލެއް ނެތް ގޮތުގައި ބަޖެޓެއް ހުށަހެޅިގެން ދިޔަ ދިއުން،" ސިޔާމް ފާހަގަކުރެއްވިއެވެ.

ރާއްޖެ އަކީ ގިނަ އަދަދެއްގެ އާމްދަނީ ލިބޭ ގައުމެއް ކަމަށާއި އެ ފައިސާ ލިބެނީ ފަތުރުވެރިކަމުގެ ދާއިރާ އިން ކަމަށް އޭނާ ވިދާޅުވިއެވެ. ވިސްނަންވީ އެ ފައިސާ އިންސާފުވެރި ކަމާއެކު ވައްކަން ނުކޮށް ހަރަދު ކުރުން ކަމަށް ސިޔާމް ވިދާޅުވިއެވެ.

ބަޖެޓުގައިވާ ބައެއް ކަންކަމަށް އަލިއަޅުއްވާލައްވަމުން ސިޔާމް ވަނީ އަންނަ އަހަރުގެ ބަޖެޓުގައި 2024ވަނަ އަހަރަށް ފާސްކުރި ބަޖެޓުގައި ފޮރިން މިނިސްޓްރީ އަށް ކަނޑައެޅި އަދަދަށްވުރެ 40 ޕަސެންޓު އަންނަ އަހަރު އިތުރުވެފައިވާ ކަމަށެވެ. އެގޮތުން ސިންގަޕޫރާއި ތައިލޭންޑާއި ޔޫއޭއީގައި ހުންނަ ރާއްޖޭގެ އެމްބަސީ އަށް ހަރަދު ކުރުމަށް އެތައް މިލިއަން ރުފިޔާއެއް ޖަހާފައިވާ ކަމަށް ސިޔާމް ވިދާޅުވިއެވެ.

ސިޔާމް ވިދާޅުވީ އެފަދަ ތަންތަނަށް ހަރަދު ކުރަނީ އެގައުމުތައް މެދުވެރިކޮށް ރާއްޖެ އަށް އެހީތައް ލިބޭނެ މަގުފަހި ކުރުމަށް ކަމަށާއި ނަމަވެސް ސިންގަޕޫރަށާއި ތައިލޭންޑުގައި ހުންނަ ރާއްޖޭގެ އެމްބަސީ އަށް އެވަރު ހަރަދު ކޮށްގެން ރާއްޖެ އަށް ލިބެނީ ކޮން ފައިދާއެއްތޯ ސިޔާމް ވަނީ ސުވާލު އުފައްދަވައިފައެވެ.

"ދުނިޔޭގެ އެކި ގައުމުތަކުގައި އެމްބަސީ ހުޅުވައިގެން ވާކަމެއް ނެތް ހަރާން،" ސިޔާމް ވިދާޅުވިއެވެ.

ސިޔާމް ވިދާޅުވީ މިއީ ދުނިޔޭގެ އެއްވެސް ގައުމަކުން ބަޖެޓު ހުށަހަޅާނެ ގޮތެއް ނޫން ކަމަށެވެ. ސަރުކާރުން ހުށަހަޅާފައި ވަނީ ވިޔަފާރި އާއި ޓްރާންސްޕޭރެންސީ އާއި ޑިމޮކްރެސީއާ ވަރަށް ދުރު ވިސްނުމެއްގެ ބަޖެޓެއް ކަމަށް ވެސް އޭނާ ވިދާޅުވިއެވެ.

"ވާނުވާއެއް ނޭނގި މި ބަޖެޓަށް ބަހުސް ކުރެވޭނެ އެއްވެސް ގޮތެއް އަޅުގަނޑުގެ ހިތަކަށް އަޅުގަނޑުގެ ސިކުނޑިއަކަށް ނުވިސްނޭ،" ވިޔަފާރިވެރިޔާ ސިޔާމް ވިދާޅުވިއެވެ.

ސިޔާމް ވަނީ ދިވެހިންނަށާއި ރައްޔިތުންގެ މަޖިލިސް މެންބަރުންނަށް ތަންދޮރު އެނގޭނެ ގޮތަކަށް ބަޖެޓު ހުށަހެޅުމަށް ގޮވާލައިފައެވެ. އަދި މިހާރު މަޖިލީހަށް ހުށަހަޅާފައިވާ ބަޖެޓު އަނބުރާ ފޮނުވާލުމަށް އޭނާ ގޮވާލެއްވިއެވެ. އެހެންނޫން ނަމަ ބަޖެޓަށް ވޯޓު ނުދެއްވޭނެ ކަމަށް ސިޔާމް ވިދާޅުވިއެވެ.