މެދުކެނޑުމެއް ނެތި ދިވެހި ރައްޔިތުންނަށް އާސަންދަ ލިބޭނެކަން ކަށަވަރު ކުރުމަށް ރައްޔިތުންގެ މަޖިލީހަށް ހުށަހެޅި ކުއްލި މައްސަލަ ބަލައިނުގަތުމަށް ނިންމައިފިއެވެ.

އިދިކޮޅު އެމްޑީޕީން އެ މައްސަލަ މަޖިލީހަށް ހުށަހެޅީ ގަލޮޅު އުތުރު ދާއިރާގެ މެންބަރު މުހައްމަދު އިބްރާހީމް (ކުޑޫ) އެވެ. ކުޑޫގެ އެ މައްސަލަ ބަލައިނުގަތުމަށް ރިޔާސަތުން ނިންމީ މަޖިލީހުގެ ގަވާއިދާ ހިލާފުވުމުންނެވެ.

މަޖިލީހުގެ ރިޔާސަތުގައި އިންނެވި މަޖިލިސް ރައީސް އަބްދުއްރަހީމް ވިދާޅުވީ ކުޑޫ ހުށަހެޅުއްވި ކުއްލި މައްސަލަ މަޖިލީހުގެ ގަވާއިދުގެ 197ވަނަ މާއްދާއާ ހިލާފު ކަމަށެވެ. ރިޔާސަތުން ވިދާޅުވީ މަޖިލިސް ގަވާއިދުގައި ބުނާ ޝަރުތު އެ މައްސަލައަށް ހަމަނުވާ ކަމަށެވެ.

ގަވާއިދުގައި ބުނަނީ ކުއްލި މައްސަލައެއްގެ ގޮތަށް ހުށަހަޅަން ވާނީ ކުއްލިއަކަށް ނުވަތަ ވޭތުވެދިޔަ ހަތް ދުވަހުގެ ތެރޭގައި ހިނގައިގެން އުޅޭ ކަމެއް ކަމަށެވެ.

އެ މައްސަލާގައި ސިއްހީ ހިދުމަތް ހޯދުމަށް އަމިއްލަ އަތުން ހަރަދު ކުރުމާއި ގުޅޭ ގޮތުން ވަނީ ކަންބޮޑުވުންފާޅު ކޮށްފައެވެ.