މީޑިއާތަކުން އެދިގެން ކަމަށް ބުނެ، މޯލްޑިވްސް މީޑިއާ ކައުންސިލް (އެމްއެމްސީ)އިން ހުސްވެފައިވާ 10 މެމްބަރުންގެ ގޮނޑިއަށް އަލުން ކުރިމަތިލުމަށް ހުޅުވާލައިފިއެވެ.

މޯލްޑިވްސް މީޑިއާ ކައުންސިލްގެ ގާނޫނުގެ ދަށުން، އެ ކައުންސިލަށް ކުރިމަތިލާ މެމްބަރުންގެ އިންތިހާބު ބާއްވަންޖެހެނީ މީޑިއާގެ ކަންތައް ހިންގުމުގެ މަސްއޫލިއްޔަތު ހަވާލުކޮށްފައިވާ މިނިސްޓްރީންނެވެ. އެކަން ކުރިން ކުރަމުންދިޔައީ ހޯމް މިނިސްޓްރީންނެވެ. ނަމަވެސް ސަރުކާރުން ވުޒާރާތަކަށް މި ސަރުކާރުން ގެނައި ބަދަލާ އެކު، މީޑިއާ ކައުންސިލްގެ އިންތިހާބު މިހާރު ބާއްވަނީ ޔޫތު އެމްޕަވަރމަންޓް، އިންފޮމޭޝަން އެންޑް އާޓްސް މިނިސްޓްރީންނެވެ.

މީޑިއާ ކައުންސިލަށް ކުރިމަތިލުމަށް ދިން ހަތް ދުވަހުގެ މުއްދަތު މިދިޔަ ސެޕްޓެމްބަރު މަހުގެ 25 ވަނަ ދުވަހަށް ހަމަވިތާ، 28 ދުވަސް ފަހުން އެ މިނިސްޓްރީން މިއަދު ކުރި އިއުލާންނެއްގައި ބުނެފައި ވަނީ އިންތިޚާބަށް ކުރިމަތިލުމަށް ދިން މުއްދަތު އިތުރުކޮށްދިނުމަށް މީޑިއާތަކުން އެދެމުންދާތީ އެ މުއްދަތު އިތުރުކޮށްފައިވާ ކަމަށެވެ.

ކުރިމަތިލުމުގެ މުއްދަތު އިތުރު ކުރުމަށް އެދުނީ ކޮން މީޑިއާތަކަކުންތޯ ޔޫތު މިނިސްޓަރު އިބްރާހިމް ވަހީދު (އަސްވާޑު)އާ "ހަތާވީސް"އިން ސުވާލު ކުރުމުން އެއީ ކޮން ބައެއް ކަމެއް ވިދާޅެއްނުވިއެވެ. ހަމައެކަނި ވިދާޅުވީ "ތި އުޅޭ އެންމެން" އެކަމާ ގުޅޭ ގޮތުން ގުޅި ކަމަށެވެ. ނަމަވެސް އެއީ ކޮން ބައެއް ކަމެއް ވިދާޅެއްނުވިއެވެ.

އިންތިހާބަށް ކުރިމަތިލުމަށް އަލުން މިއަދު ހުޅުވާލާފައި މި ވަނީ އިންތިހާބުގައި ވޯޓުލުމަށް ރަޖިސްޓްރީ ކުރުމަށް ދިން މުއްދަތު މިއަދު ހަމަވާން ތިން ގަޑިއިރަށްވެފައިވަނިކޮށެވެ.

އިންތިހާބުގައި ވޯޓުލުމަށް ރަޖިސްޓްރީ ކުރަން ހުޅުވާލިއިރު، ވޯޓުލާ ދުވަހެއް، އަދި ކުރިމަތިލި ކެންޑިޑޭޓުންގެ ނަންތަކެއް ވެސް އިއުލާނެއް ނުކުރެއެވެ.

މީޑިއާ ކައުންސިލަށް މެންބަރުން އިންތިހާބުކުރުމުގައި އަމަލު ކުރާނެ ގޮތުގެ އުސޫލުގައި ބުނެފައި ވަނީ މީޑިއާ ކައުންސިލުގެ ހިނގަމުންދާ ދައުރު ހަމަވުމުގެ ތިން މަސް ދުވަސް ކުރިން މީޑިއާ ކައުންސިލުގެ މެންބަރުކަމަށް ކުރިމަތިލުމަށް އާންމުކޮށް އިއުލާން ކުރަންވާނެއެވެ.

މީޑިއާ ކައުންސިލްގައި މިހާރު ތިއްބެވި 10 މެމްބަރެއްގެ ދައުރުގެ މުއްދަތު ހަމަވާނީ އަންނަ ޑިސެމްބަރު 15 އަށެވެ.

މީޑިއާތަކުން އެދިގެން އަލުން އިންތިހާބަށް ހުޅުވާލެވޭނެ ކަމަށް އެ އުސޫލު ބުނެފައެއް ނުވެއެވެ.

އެ އުސޫލުގައި ބުނެފައިވާ ގޮތުން އެ އިންތިހާބު އިންތިޒާމުކޮށް ބަލަހައްޓާނީ މިނިސްޓަރު އެކުލަވާލާފައިވާ ފަސް މެމްބަރުންގެ ކޮމިޓީއަކުން ކަމަށެވެ. ނަމަވެސް އަލުން ކުރިމަތިލުމށް ހުޅުވާލީ އެ ކޮމިޓީގެ ނިންމައިގެން ކަމެއް ނުވަތަ ވަޒީރުގެ ނިންމުމެއް ކަމެއް އިއުލާންގައި ބުނެފައެއް ނުވެއެވެ.

މީީޑިއާ ކައުންސިލް އުފައްދާފައި ވަނީ 2009 ވަނަ އަހަރުއެވެ. އެ ކައުންސިލްގައި ޖުމްލަ 15 މެމްބަރުން ތިއްބަވައެވެ. އެއީ މީޑިއާތައް ތަމްސީލު ކުރައްވާ އަށް މެމްބަރުންނާއި އާންމުންގެ ތެރެއިން އިންތިހާބު ކުރާ ހަތް މެމްބަރުންނެވެ.

މީޑިއާ ކައުންސިލްގެ މަގްސަދުތަކުގެ ތެރޭގައި މީޑިއާގެ މިނިވަންކަން ރާއްޖޭގައި ދެމެހެއްޓުމާއި އެ މިނިވަންކަމަށް އުނިކަން އަންނަ ކަންކަން ބަލައި ފިޔަވަޅު އެޅުން ހިމެއެވެ.