ދިގު މުއްދަތަކަށް ރާއްޖެ އިން ބޭރުން ދޭ ރިހެބިލިޓޭޝަނަކީ އާސަންދަ ސްކީމުގެ ދަށުން ކަވަރު ކުރާ ކަމެއް ނޫން ކަމަށް އެކުންފުނިން މިއަދު ބުނެފިއެވެ.

މިދިޔަ އަންގާރަ ދުވަހު ރައީސް އޮފީހުގައި ބޭއްވި ނޫސްވެރިންގެ ބައްދަލުވުމެއްގައި ރައީސް އޮފީހުގެ އިސް ތަރުޖަމާން ހީނާ ވަލީދު ވަނީ އާސަންދައިން ކުރާ ބޭކާރު ހަރަދުތައް ކުޑަ ކުރާނެ ކަމަށް ކޮންމެ ސަރުކާރަކުން ވެސް ބުނާ ކަމަށާއި ނަމަވެސް މިހާތަނަށް އެފަދައިން އެއްވެސް ސަރުކާރަކަށް ކަންކަން ނުކުރެވޭ ކަމަށް ވިދާޅުވެފައެވެ. ނަމަވެސް މި ސަރުކާރުން އެކަންކަން އިސްލާހު ކުރާނެ ކަމަށް އޭނާ ވިދާޅުވިއެވެ. އާސަންދަ އަކީ ވެސް އެންމެ ބޭނުންވާ މީހާ އަށް ލިބޭނެ އެއްޗަކަށް ހަދާނެ ކަމަށް ވެސް ވިދާޅުވިއެވެ.

ހީނާގެ އެ ވާހަކަތައް ދޮގުކޮށް އާއްމު ފަރާތަކުން ސޯޝަލް މީޑިއާގައި ވަނީ ސައުދީ އަރަބިއްޔާގެ މައްކާގައި ހުންނަ "އަލް ނޫރު ހޮސްޕިޓަލް" އިން ފަރުވާ ކުޑަ ކޮށްލައިގެން ކާޑިއެކް އެރެސްޓްކަށް ދުއްވާލި އޭނާގެ މަންމަ އިންޑިޔާ އަށް ގެނެސް އާސަންދައިގެ ދަށުން "އެސްޓަރ މެޑިސިޓީ" ފަރުވާ ދެމުން ދަނިކޮށް އާސަންދާ ކަނޑާލީ އެއްވެސް ރަހުމެއް ނެތި ކަމަށް ތުހުމަތު ކޮށްފައެވެ.

އަދި ބުނީ މަހަކު 17،000 ޑޮލަރާއި 20،000 ޑޮލަރާއި ދެމެދު ބިލަށް އަރާއިރު އާސަންދަ އިން އެއިން އެއްވެސް ބިލެއްގައި ނުހިފާ ކަމަށެވެ.

"މަންމައަށް ދޭ ފަރުވާ ރާއްޖެއިން ދެވޭ ފަރުވާ ކަމަށް ބުނެ ކަނޑާލީ، އެ ފަރުވާ ދެވެނީ ކޮންތާކުންތޯ އަންގާ ސިޓީއެއް ދޭން އަސަންދާގައި އެދުމުން އެކަމަކީ ކުރެވޭނެ ކަމެއް ނޫން ކަމަށް ބުނި. ހަމަ ތިޔަ ސަރުކާރުން މިއަދު މި ޢާއިލާއަށް މިއޮތީ ނާށިގަނޑު ހިފައިގެން ސަލާންޖަހަން ނުކުންނަން މަޖުބޫރު ކުރުވާފައި،" އޭނާ ބުންޏެވެ.

ނަމަވެސް އާސަންދަ އިން މިއަދު ވަނީ އެކަމުގެ ހަގީގަތް ހާމަކޮށް ބަޔާނެއް ނެރެފައެވެ. އާސަންދަ އިން ބުނީ އޭނާ ދައްކަމުން ދަނީ އެއްވެސް ހަގީގަތެއް ނެތް ދޮގު ވާހަކަތަކެއް ކަމަށެވެ. އޭނާގެ މަންމަ އަކީ އުމުރުން 65 އަހަރުގެ މީހެއް ކަމަށާއި އެ އަންހެން މީހާ ސައުދީ އަރަބިއްޔާގެ ޖިއްދާ އިން އިންޑިއާ އަށް ގެންގޮސްފައި ވަނީ އެއާ އެމްބިއުލާންސްގައި ޒަކާތު ފަންޑުގެ އެހީގައި ކަމަށެވެ.

"މިގޮތުން އާސަންދަ، އެންސްޕާ އަދި ޒަކާތު ފަންޑު ހިމަނައިގެން ދައުލަތުގެ ފަރާތުން އެހީގެ ގޮތުގައި ގާތްގަނޑަކަށް 1.5 މިލިއަނަށްވުރެ ގިނަ ރުފިޔާ އެފަރާތަށް ވަނީ ހަމަޖައްސަައި ދެވިފައެވެ،" އާސަންދައިގެ ބަޔާނުގައިވެއެވެ.

އެ ބަޔާނުގައި އެކުންފުނިން ބުނީ އެ އަންހެން މީހާ އަށް ފަރުވާ ދެނީ ހައިޕޮކްސިކް އިސްކެމިކް އެންސަޕަލޯޕެތީ އަށް ކަމަށާއި އިންޓެންސިވް ރިހެބިލިޓޭޝަން އަށް އެޑްމިޓު ކުރުމަށް އެސްޓާ ސީއެމްއައި އިން އާސަންދަ އަށް ރިކުއެސްޓު ފޮނުވީ މިދިޔަ މާޗު މަހުގެ 14ވަނަ ދުވަހު ކަމަށެވެ.

އަދި ބަލިމީހާގެ ހާލަތު ފުރިހަމަ އަށް އިވެލުއޭޓު ކުރުމަށްފަހު މިދިޔަ އޮގަސްޓު މަހުގެ 18ވަނަ ދުވަހާއި ހަމައަށް ހޭދަވީ މުއްދަތުގައި ހޮސްޕިޓަލުން ފޮނުވި ހުރިހާ އިންޓެރިމް ބިލުތަކަށް އާސަންދަ އިން އެޕްރޫވް ދީފައިވާ ކަމަށް ވެސް އެކުންފުނިން ބުންޏެވެ.

ފަސް މަސް ދުވަހު ތެރޭގައިވެސް ބަލި މީހާގެ ހާލަތަށް ބަދަލު އައިސްފައި ނުވާތީ އިތުރު ސަޕޯޓިވް ކެއާ ރާއްޖޭގައި ކުރިޔަށް ގެންދިއުމަށް ވެންޓިލޭޓަރު ސަޕޯޓާއެކު ބަލިމީހާ އަނބުރާ ގެނައުމަށް މިދިޔަ އޮގަސްޓު މަހުގެ 14ވަނަ ދުވަހު ބަލިމީހާގެ އާއިލާއާއެކު ވާހަކަދެކެވިފައި ވާނެ ކަމަށްވެސް އާސަންދަ އިން ބުންޏެވެ.

"އަދި ރާއްޖޭގައި އަލްޓަނޭޓިވް ރިހަބިލިޓޭޝަން އޮޕްޝަންތައް ހުރި ކަމަށާއި ރާއްޖެއިން ބޭރުގައި ދިގު މުއްދަތަކަށް ރިހަބިލިޓޭޝަން ދިނުމަކީ އާސަންދަ ސްކީމުގެ ދަށުން ކަވަރު ނުކުރާ ކަމެއްކަން އާއިލާ އަށް ކިޔައިދީ ރާއްޖޭގައި ކުރިޔަށް ގެންދެވޭނެ ފަރުވާ ޕްލޭނަކާއެކު ތިން ދުވަހުގެ ތެރޭގައި ބަލިމީހާ އަނބުރާ ރާއްޖެ އަށް ބަދަލުކުރުމާއި ގުޅޭ ގޮތުން ވެސް ވަނީ އާއިލާއާ ވާހަކަދައްކައިފައެވެ،" އާސަންދަ އިން ބުންޏެވެ.

އެކުންފުނިން ބުނީ މިދިޔަ އޮގަސްޓު މަހުގެ 18ވަނަ ދުވަހުގެ ނިޔަލަށް ހޮސްޕިޓަލުގެ ފަރުވާ އަށް ހިނގާފައިވާ ހަރަދުތަކުގެ ފައިނަލް ބިލު ލިބިފައިވާ ކަމަށެވެ. އެގޮތުން މުޅި ޖުމްލަ 89،339.91 ޑޮލަރު އަރާފައިވާ ކަމަށާއި އާސަންދަ އިން ކަވަރު ނުކުރާ ޗާޖުތައް އުނި ކުރުމަށްފަހު 85،989.15 ޑޮލަރު ބަލިމީހާގެ ބިލުން ހަމަޖައްސައި ދިނުމަށް އެޕްރޫވް ކޮށްފައިވާ ކަމަށް އާސަންދަ އިން ބުންޏެވެ.