ހުސްވެފައިވާ ޕްރޮސެކިއުޓާ ޖެނަރަލް (ޕީޖީ)ގެ މަގާމަށް ރައީސް އޮފީހުގެ ސްޓޭޓް މިނިސްޓަރު ފެންވަރު މަގާމެއްގައި ހުންނެވި ޢައްބާސް ޝަރީފު އައްޔަން ކުރަން ރައްޔިތުންގެ މަޖިލީހަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު ހުށަހަޅުއްވައިފިއެވެ.

ހ. ޔެލޯ ރޯސް، އައްބާސް ޝަރީފު މިހާރު ހުންނެވީ ރައީސް އޮފީހުގެ ސެކްރެޓެރީ ޓު ދަ ޕްރެޒިޑެންޓް އޮން ލީގަލް އެންޑް ޕާލަމެންޓްރީ އެފެއާޒްގެ މަގާމުގައެވެ. އޭނާއަކީ ހައި ކޯޓުގެ ފަނޑިޔާރުކަން ވެސް ކުރެއްވި ބޭފުޅެކެވެ.

ޕީޖީގެ މަގާމަށް އައްބާސްއާ އެކު، ހަ ބޭފުޅަކު ކުރިމަތިލެއްވިއެވެ. ނަމަވެސް ރައީސް މަޖިލީހަށް ހުށަހެޅުއްވީ އައްބާސްގެ ނަންފުޅު އެކަންޏެވެ. އައްބާސްގެ ނަން ކޮމެޓީން ދިރާސާކޮށް ނިންމައި، މަޖިލީހުގެ ތަޅުމަށް ހުށަހެޅުމުން ވޯޓަށް އަހާނީ އައްބާސްގެ ނަމަށް އެކަންޏެވެ.

ޕީޖީގެ މަގާމަށް ކުރިމަތިލެއްވި ބޭފުޅުން:

  1. އައްބާސް ޝަރީފު، ހ. ޔެލޯ ރޯސް
  2. މަރްޔަމް ނިހާޔަތު، މ. ތާޖު
  3. އަހްމަދު ހައިލަމް، އޯޝަންލީޑް، ހިތަދޫ
  4. އަލީ ސަމީރު، މއ. ވޭސައިޓް 610 ފްލެޓް
  5. އަހުމަދު ޔާމީން، ހ. ދިއްލީގެ
  6. އިބްރާހިމް އަލީ ހުޅުމާލެ ހިޔާ 02-13-16

ޕީޖީގެ މަގާމަށް އައްބާސް އައްޔަން ކުރަން ރައީސް މަޖިލީހަށް ފޮނުއްވުމުން، މިރޭ 9 ޖެހިއިރު ބޭއްވި މަޖިލީހުގެ ޖަލްސާގައި އޭނާގެ ނަން ދިރާސާ ކުރުމަށް ޖުޑިޝަރީ ކޮމިޓީއަށް ވަނީ ފޮނުވާފައެވެ.

ޖުޑިޝަރީ ކޮމެޓީން މިރޭ ބޭއްވި ބައްދަލުވުމުގައި ފާސްކޮށްފައި ވަނީ އައްބާސް ޝަރީފާމެދު އާންމުންގެ ޝަކުވާއެއް އޮތް ނަމަ، މި މަހުގެ 16 ވަނަ ދުވަހުގެ ކުރިން އަންގަވައި ދިނުމަށް އެދި މަޖިލީހުން އިއުލާން ކުރުމަށެވެ.

ޕީޖީގެ މަގާމު ހުސްވެފައި ވަނީ އެ މަގާމުގައި ހުންނެވި ހުސައިން ޝަމީމްގެ އިތުބާރު ނެތް ކަމަށް މަޖިލީހުން ފާސްކުރުމުންނެވެ. ޝަމީމް ވިދާޅުވީ އޭނާ މަގާމުން ވަކިކުރުމުގެ ކުރިން، އިސްތިއުފާ ދެއްވާފައިވާ ކަމަށެވެ.