ދުނިޔޭގެ އެންމެ ބޮޑު އެއް ކްރެޑިޓް ރޭޓިން އޭޖެންސީ ކަމަށްވާ މޫޑީސް އިން ރާއްޖޭގެ ރޭޓިން ދަށްކޮށް, އިތުރަށް ވެސް ރޭޓިން ދަށްވެދާނެ ކަމުގެ އިންޒާރު ދީފި އެވެ.

މޫޑީސްގެ ރޭޓިންގައި ކުރިން ރާއްޖެ އޮތީ އެއް "ސީއޭއޭ1"ގަ އެވެ. އެ އަށް ވުރެ އެއް ދަރަޖަ ދަށްކޮށް, "ސީސީއޭ2" އަށް ދަށް ކުރުމާއެކު މޫޑީސްއިން ވަނީ ރާއްޖޭގެ އައުޓްލުކް ރިވިއުގައި ހިމަނައިފައެވެ. އެހެންކަމުން ކުރިއަށް އޮތް ތަނުގައި ވެސް ރޭޓިން ދަށްވެދާނެ ކަމަށް މޫޑީސްއިން ބުންޏެވެ.

"ސީއޭއޭ2" ރޭންކިންއަކީ އޮކްޓޫބަރު, 2021 ގައި ރާއްޖޭގެ ރޭޓިން އޮތް މިންވަރަށް ވުރެ ވެސް ދަށް މިންގަނޑެކެވެ. އޭގެ ސަބަބެއްގެ ގޮތުގައި މޫޑީސްއިން ބުނީ ކުރިން ފާހަގަ ކޮށްފައިވާ މާލީ މައްސަލަތަކުގައި އެކަށީގެންވާ އިސްލާހީ ފިޔަވަޅުތަކެއް ސަރުކާރުން އަޅާފައި ނުވާތީ ކަމަށެވެ.

މޫޑީސް އިން ވަނީ ރާއްޖޭގެ ސުކޫކު ވެސް "ސީއޭއޭ2" އަށް ދަށްކޮފައެވެ. ސުކޫކުގެ ރޭޓިންގެ އައުޓްލުކް ވެސް ވަނީ "އަންޑަ ރިވިއު"ގައި ހިމަނައިފައެވެ. އެއީ ބޭރުގެ ދަރަނި އިތުރުވެ, ބަޖެޓު ޑެފިސިޓުގެ ސަބަބުން ޑޮލަރަށް އޮންނަ ޑިމާންޑް ބޮޑުވެ އެކްސްޗޭންޖް ރޭޓް ދަމަހައްޓަން ގޮންޖެހުންތައް ކުރިމަތިވެފައިވާތީ ކަމަށް މޫޑީސް އިން ބުންޏެވެ. އަދި ރާއްޖޭގެ ރިޒާވް ވަރަށް ބޮޑަށް ދަށްވަމުން ދާ ކަމަށް ވެސް މޫޑީސްއިން ބުންޏެވެ.

ދިވެހި ރުފިޔާ އާއި ބޭރު ފައިސާގެ ސީލިން ވަނީ ބީ2 އާއި ސީއޭއޭ1 އަށް ދަށްކޮށްފަ އެވެ. އެއީ ތިން ދަރަޖައިގެ ވެއްޓުމެކެވެ. މޫޑީސް އިން ބުނީ، ކުރިއަށް އޮތް 12-18 މަސް ދުވަހު ރާއްޖެއިން ދައްކަން ޖެހޭ ބޭރުގެ ދަރަންޏާ އަޅާ ބަލާ އިރު ރާއްޖޭގެ ރިޒާވު ވަރަށް ބޮޑަށް ދަށްވަމުން ދާ ކަމަށެވެ.

މޫޑިސްގެ އިތުރުން ފިޗްގެ ރޭޓިންގައި މިދިޔަ މަހު ރާއްޖޭގެ ރޭޓިން ސީސީސީ އިން ސީސީއަށް ވަނީ ދަށްކޮށްފަ އެވެ.