ފެނަކަ ކޯޕަރޭޝަން ލިމިޑެޓް، (ފެނަކަ)ގެ ގަވަރނަންސް ސިސްޓަމް ހަރުދަނާކޮށް، ރައްޔިތުންނަށް ފޯރުކޮށްދޭ ހިދުމަތްތަކުގެ ފެންވަރު ރަނގަޅު ކުރުމަށް އެ ކުންފުނި އެސްޓީއޯގެ ދަށަށް ބަދަލު ކުރުމަށް ނިންމާފައި ވަނީ އަންނަ އަހަރުން ފެށިގެން ކަމަށް އެސްޓީއޯއިން ބުނެފިއެވެ.

އެސްޓީއޯގެ ސަބްސިޑަރީ ކުންފުންޏަކަށް ފެނަކަ ބަދަލުކުރުމާ ގުޅޭ ގޮތުން އެސްޓީއޯއިން މިއަދު ކުރި އިއުލާނެއްގައި ބުނެފައި ވަނީ ފެނަކަ އެ ކުންފުނީގެ ދަށަށް ބަދަލު ކުރަނީ އެސްޓީއޯއިން ސަރުކާރަށް ހުށަހެޅި ޕްރޮޕޯސަލްއަކަށް ބިނާކޮށް، މިދިޔަ އާދީއްތަ ދުވަހު ކެބިނެޓުން ނިންމައިގެން ކަމަށެވެ.

"އެސްޓީއޯއިން ސަރުކާރަށް 2024 އޮގަސްޓް 25 ވަނަ ދުވަހު ޕްރޮޕޯސަލެއް ހުށަހެޅުނެވެ. މި ޕްރޮޕޯސަލް ގަބޫލުކޮށް، ފެނަކައަކީ އެސްޓީއޯގެ 100 އިންސައްތަ ހިއްސާވާ ކުންފުންޏަކަށް ބަދަލުކުރުމަށް، 2024 އޮގަސްޓް 25 ވަނަ ދުވަހު ސަރުކާރުން ވަނީ ނިންމާފައެވެ،" އެސްޓީއޯއިން މިއަދު ކުރި އިއުލާންގައިވެއެވެ.

ސަރުކާރުގެ އެ ނިންމުމާ އެކު، އަންނަ އަހަރުން ފެށިގެން ފެނަކައަކީ އެސްޓީއޯގެ ސަބްސިޑަރީއަކަށް ބަދަލު ކުރުމަށް އިއްޔެ ބޭއްވި އެސްޓީއޯގެ ބޯޑު ބައްދަލުވުމުގައި ނިންމާފައިވާ ކަމަށް އެ ކުންފުނިން ބުންޏެވެ. އަދި އެ މަސައްކަތް ކުރުމަށް ފެނަކަ އާއި ފިނޭންސް މިނިސްޓްރީ ގުޅިގެން ޕްލޭނެއް އެކުލަވާލުމަށް ނިންމާފައިވާ ކަމަށް އެސްޓީއޯއިން ބުންޏެވެ.

ފެނަކަ ސަބްސިޑަރީއަކަށް ބަދަލު ކުރުމުގެ ޕްލޭން

  • ފައިނޭންޝަލް އަދި ލީގަލް ޑިޔު ޑިލިޖެންސް ހެދުން
  • އެސެޓްތައް ވެލިއުކުރުން
  • މާލި ހާލަތު ދެނެގަތުން
  • ކުންފުނި ރައިޓްސައިޒް ކުރުން

އެސްޓީއޯއިން ބުނީ ފެނަކައިގެ އިންޓަރިމް ބޯޑު އެކުލަވާލުމަށް ހަމަޖެހިފައި ވަނީ އެސްޓީއޯ އާއި ފިނޭންސް މިނިސްޓްރީ އާއި އެންވާރަމަންޓް މިނިސްޓްރީ ތަމްސީލު ކުރާ ފަރާތްތައް ހިމެނޭ ގޮތަށް ކަމަށެވެ.

އެސްޓީއޯގެ ދަށަށް ފެނަކަ މުޅިން ބަދަލުކުރެވުމާ އެކު، އެ ކުންފުނީގެ ޑިރެކްޓަރުންގެ ބޯޑު ދެން އެކުލަވާލާނީ އެސްޓީއޯގެ ގަވަރނަންސް ކޯޑާއި ސަބްސިޑަރީތަކަށް މެންބަރުން އައްޔަން ކުރާ އުސޫލާ އެއްގޮތަށް ކަމަށް އެ ކުންފުނިން ބުންޏެވެ.

އެސްޓީއޯއިން ބުނީ ފެނަކައިގެ ދަރަނީގެ ބޮޑު ބަޔަކީ އެސްޓީއޯ ގްރޫޕަށް ދައްކަންޖެހޭ ފައިސާ ކަމަށެވެ. ސަބަބަކީ އެސްޓީއޯއިން ގަނެފައިވާ ތެލަށް އެ ކުންފުނިން ދައްކަންޖެހޭ ފައިސާ ދަރަނީގެ ތެރޭގައި ހިމެނޭތީއެވެ.

"މި ފައިސާ އެސްޓީއޯ ގްރޫޕަށް ލިބޭނެ ގޮތުގެ ޕްލޭނެއް ހެދި އެ އާއި އެއްގޮތަށް ފައިސާ ހޯދުމަށް މަސައްކަތްކޮށް ފެނަކައަކި ފައިދާވާނެ ކުންފުންޏަކަށް ހެދުމަށް އެސްޓީއޯއިން މަސައްކަތް ކުރާނެކަމުގެ ޔަގީންކަން މި ކުންފުނީގެ އެންމެހާ ހިއްސާދާރުންނާއި އެހެނިގެން ސްޓޭކް ހޯލްޑަރުންނަށް އަރުވަމެވެ،" އެސްޓީއޯއިން ބުންޏެވެ.