އޮސްޓްރޭލިޔާ މޯލްޑިވްސް ފްރެންޑްޝިޕް އެސޯސިއޭޝަންގެ ނަމުގައި އާ ޖަމްޢިއްޔާ އެއް މިނިސްޓްރީ އޮފް ޔޫތް އެމްޕަވަރމަންޓް، އިންފޮމޭޝަން އެންޑް އާޓްސް ރަޖިސްޓްރީކޮށްފިއެވެ.

މި މަހު ކުރީކޮޅު ރަޖިސްޓްރީ ކުރި އެ ޖަމިއްޔާގެ ހިންގާ ކޮމިޓީގެ މަޤާމުތަކަށް އައްޔަން ކުރެއްވި ބޭފުޅުންގެ ތެރޭގައި ކުރީގެ ބައެއް ވަޒީރުން ހިމެނިވަޑައިގަންނަވައެވެ. އެ ޖަމިއްޔާގެ މުއައްސިސުންނަކީ ކުރީގެ ހަޔަރ އެޑިއުކޭޝަން މިނިސްތަރު ޑރ. އިބްރާހިމް ހަސަން އާއި ކުރީގެ ހެލްތު މިނިސްޓަރު ޑރ. މަރިޔަމް ޝަކީލާ އާއި ކުރީގެ ޓޫރިޒަމް މިނިސްޓަރު އަދި ދާދިފަހުން އެލްޖީއޭގެ ސީއީއޯގެ މަގާމު ވެސް ފުރުއްވެވި ޑރ. މަރިޔަމް ޒުލްފާ އާއި ޑރ. އާރިފް މުޙައްމަދު އާއި ޑރ. އާމިނަތު މުޙައްމަދު ދީދީ އާއި އާމިނަތު ޞަލާހުގެ އިތުރުން ފަޔާޒް މަންސޫރުއެވެ.

އެ އެސޯސިއޭޝަންގެ ހިންގާ ކޮމިޓީގެ ރައީސްގެ މަޤާމަށް އިންތިޚާބުކޮށްފައިވަނީ ޑރ ޢިބްރާހިމް ޙަސަނެވެ. ނާއިބު ރައީސަކަށް އިންތިޚާބުވީ އައިމިނަތު ޞަލާޙުއެވެ. ހިންގާ ކޮމިޓީގައި ދެން ހިމެނެނީ ޚަޒާންދާރާއި ސެކްރެޓަރީ ޖެނަރަލްއަކާއި އަދި އިތުރު ތިން މެންބަރުންނެވެ.

"މި ޖަމްޢިއްޔާގެ މަޤްޞަދަކީ އޮސްޓްރޭލިއާ އާއި ދިވެހިރާއްޖެ އާއި ދެމެދު އޮންނަ މަދަނީ ގުޅުން އިތުރަށް ބަދަހި ކުރުމަށް ކަމާއި ބެހޭ ފަރާތްތަކަށް އެހީތެރިވެ މިފަދަ ގުޅުންތައް ކުރިއަރުވާ، އިތުރަށް ތަރައްޤީކޮށް، ފުޅާކޮށްދިނުމެވެ،" އޮސްޓްރޭލިޔާ މޯލްޑިވްސް ފްރެންޑްޝިޕް އެސޯސިއޭޝަންގެ ފުރަތަމަ ނޫސްބަޔާނުގައި ބުނެފައިވެއެވެ.

އެ ޖަމްޢިއްޔާގެ ފަރާތުން ހިންގާ ހަރަކާތްތަކުގެ ތެރޭގައި ދަރިވަރުންނާއި ވޮލަންޓިއަރުންގެ ދެމެދު ހިންގޭ އެކްސްޗޭންޖް ޕޮރޮގްރާމްތަކާއި، ކުޅިވަރު އަދި އެހެނިހެން ސަގާފީ އަދި އިޖްތިމާޢީ ހަރަކާތްތަކާއި، ވިޔަފާރި އާއި އިންވެސްޓްމަންޓްތައް ކުރިއަރުވާ ފުޅާކުރުން ހިމެނެއެވެ.