އިދިކޮޅު ސިޔާސީ ޕާޓީ، އެމްޑީޕީ މިއަދު ކޮބައިތޯ ރައްޔިތުން ސުވާލު ކުރަމުންދާ ކަމަށް އެ ޕާޓީގެ ގައުމީ މަޖިލީހުގެ ފޭދޫ އުތުރު ދާއިރާގެ މެމްބަރު އަހުމަދު ޝަރީފު (ޑުންގާ) ވިދާޅުވެއްޖެއެވެ.

ކުރީގެ މަޝްހޫރު ފުޓުބޯޅަ ކުޅުންތެރިޔާ ޑުންގާ އެހެން ވިދާޅުވީ އެމްޑީޕީން ރޭ ބޭއްވި ގައުމީ މަޖިލީހުގައި ވާހަކަ ދައްކަވަމުންނެވެ.

އެމްޑީޕީ މަޖިލިސް ޕްރައިމަރީގައި އައްޑޫ މީދޫ ދާއިރާގެ ކުރީގެ މެމްބަރު ރޮޒައިނާ އާދަމްއާ ވާދަކުރައްވައި، ފޭދޫ އުތުރު ދާއިރާގެ އެމްޑީޕީ މަޖިލިސް ޓިކެޓް ހޯއްދެވި ޑުންގާ ރޭ ވިދާޅުވީ "ފިނިކޮޓަރީގައި ވާހަކަ ދައްކަން" ތިބެވެން ނެތް ކަމަށެވެ.

ސަރުކާރަށް ނުވަ މަސްވީއިރު، ފެށުނު ޕްރޮޖެކްޓެއް ނެތް ކަމަށާއި ނުހުއްޓުވާ އެއްވެސް ޕްރޮޖެކްޓެއް ވެސް ނެތް ކަމަށެވެ.

"މި ކޮޓަރި ތެރޭގައި އެއާކޯން ތެރޭގައި ތިބެންވީތޯ އަޅުގަނޑުގެ ސުވާލަކީ. ކިތައް ރައްޔިތުންތޯ ސުވާލު ކުރަނީ އެމްޑީޕީ ކޮބައިތޯ؟ ދިވެހި ރައްޔިތުން ދެކުނު އެމްޑީޕީ، ދިވެހި ރައްޔިތުންގެ ހައްގުގައި 2003 ފެށިގެން ނުކުމެ، މަގުމަތީގައި އުޅުނު އެމްޑީޕީ ކޮބައިތޯ ސުވާލު ކުރަނީ މިހާރު،" ޑުންގާ ވިދާޅުވިއެވެ.

ޖޯޝުގައި ވާހަކަ ދައްކަވަމުން ޑުންގާ ވަނީ އެމްޑީޕީއަށް ރައްޔިތުން އެދެމުންދާ ސަބަބު ސާފުކޮށްދެއްވާފައެވެ.

އޭނާ ވިދާޅުވީ ދިވެހި ރައްޔިތުންގެ ހައްގުގައި މީގެ ކުރިން މަސައްކަތް ކުރި ބަޔަކީ އެމްޑީޕީ ކަމަށާއި ރައްޔިތުން ބަލައިގަތް ބަޔަކީ އެއީ ކަމަށެވެ.

"ނުވަ މަސް ވީމަ، ނުވިހެއިމަ ދެން އޮންނާނީ ސިޒޭރިއަން ހެދުން. ޑޮކްޓަރުން މިތިބީ މިތާނގައި. ޑޮކްޓަރު ނުކުންނަންވީ ސާމާނު ހިފައިގެން މަގުމައްޗަށް. އޮޕަރޭޝަން ކުރަން. ބޭކާރު ވާހަކަ މިތާ ދައްކާކަށް އަޅުގަނޑުމެން ތިބޭނެ ކަމެއް ނެތް،" ޑުންގާ ވިދާޅުވިއެވެ.

އައްޑޫ ސިޓީއަށް އިބޫ ކުރެއްވި ދަތުރުފުޅުގައި އެމަނިކުފާނާ އެކު ޑުންގާ -- ފޮޓޯ/ ހުސައިން ހަސަން | ހަތާވީސް