ރާއްޖޭގައި ގަވާއިދާ ހިލާފަށް ދިރިއުޅޭ ބިދޭސީންގެ މައްސަލަ ހައްލު ނުވަނީސް، އިތުރަށް ބިދޭސީ މަސައްކަތްތެރިން ރާއްޖެ އެތެރެ ކުރުމަށް ހުއްދަ ނުދޭނެ ކަމަށް ހޯމް ލޭންޑް މިނިސްޓަރު އަލީ އިހުސާން ވިދާޅުވެއްޖެއެވެ.

ބިދޭސީން ރާއްޖެ ގެންނަ ވިޔަފާރިންނާ އެކު މިނިސްޓަރު އިހުސާން މިއަދު ވަނީ ބައްދަލުކުރައްވަވައިފައެވެ. އިސްކަންދަރު ކޮށީގައި މިއަދު ބޭއްވި އެ ބައްދަލުވުމުގައި މިނިސްޓަރު އިހުސާން ވިދާޅުވީ ބިދޭސީން ގަވައިދަށް ފެއްތުމުގެ މަގުތައް ހޯދި އެ ކަންކަން ރަނގަޅަށް ހިނގައިގަތުމުން ބިދޭސީން ގެންނަން ބޯޑަރު ހުޅުވާލާނެ ކަމަށެވެ.

ވަޒީފާ އަދާކުރާ ބިދޭސީންނާ ގުޅިގެން ދޫކުރާ ހުއްދަތަކަށް ދައްކަންޖެހޭ ފީތަކާއި ޖޫރިމަނާ ނުދައްކާ އެތައް ކުންފުނިތަކެއް އެބަހުރި ކަމަށް މިނިސްޓަރިގެ ވާހަކަފުޅުގައި ފާހަގަކުރެއްވިއެވެ. އަދި ވިދާޅުވީ އެ ފީތަކާއި ޖޫރިމަނާތައް ނުދެއްކުމުން ބިދޭސީ މީހާ ވަނީ ގަވާއިދާ ހިލާފަށް އުޅޭ މީހަކަށް ކަމަށެވެ.

ހޯމްލޭންޑް މިނިސްޓްރީން ބިދޭސީންގެ ކޯޓާ ފީ އާއި ވާކް ޕާމިޓް ފީ ނުދައްކާ ކުންފުނިތަކުގެ ލިސްޓު އާއްމު ކޮށްފައި ވަނީ މިދިޔަ މަހުގެ 24ވަނަ ދުވަހުއެވެ. އެ ދުވަހު އާއްމުކުރި ލިސްޓުގައި 1،026 ކުންފުންޏެއް ހިމެނެއެވެ. އަދި އެކުންފުނިތަކުން ދައުލަތަށް 636.5 މިލިއަން ރުފިޔާ ލިބެންޖެހެއެވެ.

މިއަދުގެ ބައްދަލުވުމުގައި މިނިސްޓަރު އިހުސާން ވަނީ އެ ލިސްޓު އާއްމު ކުރުމުން ބައެއް ފަރާތްތަކުން ފައިސާ ދައްކާފައިވާ ކަމަށް ވިދާޅުވެފައެވެ. ހޯމް މިނިސްޓްރީން މީގެކުރިން ވެސް ވަނީ ބިދޭސީންގެ ކޯޓާ ފީ އާއި ވާކް ޕާމިޓް ފީ ނުދައްކާ ކުންފުނިތަކުގެ ލިސްޓު އާއްމު ކުރުމުން އޭގައި ހިމެނޭ ބައެއް ކުންފުނިތަކުން ފައިސާ ދައްކާފައިވާ ކަމަށް ބުނެފައެވެ.

މިނިސްޓަރު ވިދާޅުވާ ގޮތުގައި ބިދޭސީންގެ މައްސަލަ ހައްލު ކުރުމަށް ތިން ވަރަކަށް އަހަރު ނަގާނެއެވެ. އަދި މިހާރު ހޯމް މިނިސްޓްރީން ފަށާފައިވާ އޮޕަރޭޝަނަކީ ގަވާއިދާ ހިލާފަށް އުޅޭ ބިދޭސީން ދެނެގަތުމުގެ އޮޕަރޭޝަން ކަމަށް ވިދާޅުވިއެވެ.