ރާއްޖޭގެ ސިޔާސީ ކަންކަމުގައި މީގެކުރިން އިސްކޮށް ހަރަކާތްތެރިވެވަޑައިގެން އުޅުއްވި، ވިޔަފާރިވެރިޔާ މުހައްމަދު ޒާހިރު (އޯކޭ ޒާހިރު) ނިޔާވެއްޖެއެވެ.

ބަލިވެ އުޅުއްވާތާ ދުވަސްކޮޅެއް ވެފައިވާ ޒާހިރު ނިޔާވީ ސްރީލަންކާގައެވެ. ނިޔާވިއިރު އުމުރުފުޅަކީ 76 އަހަރެވެ.

ޒާހިރަކީ މިހާރުގެ އިދިކޮޅު ޕާޓީ އެމްޑީޕީ އުފެއްދުމުގައި އިސްކޮށް އުޅުއްވި ބޭފުޅެކެވެ. އެމްޑީޕީގެ ލ. ފޮނަދޫ ދާއިރާގެ ރައީސްކަން ވެސް އޭނާ ކުރެއްވިއެވެ.

ވިޔަފާރީގެ ދާއިރާގައި ވެސް އުޅުއްވި ޒާހިރަށް 1993ވަނަ އަހަރު ވަނީ އާއްމު ހިދުމަތުގެ ގައުމީ އިނާމުވެސް ލިބިވަޑައިގެންފައެވެ.