މާލޭގެ މަގުތަކުން 3.2 މިލިއަން ލީޓަރުގެ ފެން ޕަންޕުކޮށް، ބޭރުކޮށްފިން: އެމްއެންޑީއެފް

މިއަދު މާލެ އަށް ކުރި ވިއްސާރާގައި މާލޭގެ މަގުތަކުން ފެން ބޮޑުވުމާއި ގުޅިގެން، މާލޭގެ މަގުތަކުން 3.2 މިލިއަން ލީޓަރުގެ ފެން ޕަމްޕުކޮށް ބޭރު ކޮށްފައިވާ ކަމަށް އެމްއެންޑީއެފް އިން ބުނެފިއެވެ.

އެމްއެންޑީއެފް އިން އެކްސްގައި ކޮށްފައިވާ ޕޯސްޓެއްގައި މިރޭ ބުނީ ފެން ހިންދުމަށް އެމްއެންޑީއެފް ފަޔާ އެންޑް ރެސްކިޔު ސާވިސް އިން ކުރަމުންދާ މަސައްކަތުގައި، މާލޭގެ 10 ސަރަހައްދެއްގައި ފެން ހިންދުމުގެ މަސައްކަތް ކުރަމުން އަންނަ ކަމަށެވެ. އަދި ބުނީ މިހާތަނަށް 3،284،600 ލީޓަރުގެ ފެން ވަނީ ޕަންޕުން ބޭރުކުރެވިފައިވާ ކަމަށެވެ.

އެމްއެންޑީއެފް އިން ބުނީ 183 ގެއަކަށް ފެން ވަދެފައިވާކަމުގެ ރިޕޯޓް ލިބިފައިވާއިރު، އެ ފަރާތްތަކަށް އެހީތެރިކަން ފޯރުކޮށްދިނުމަށް އެމްއެންޑީއެފް މާލޭ އޭރިއާ ކޮމާންޑުން ކުރަމުންދާ މަސައްކަތުގައި، މާލޭ ސިޓީގެ ގިނަ މުއައްސަސާތަކެއް ހަރަކާތްތެރިވަމުން އަންނަ ކަމަށެވެ.

މީގެއިތުރުންވެސް ވާރޭ ވެހި މާލޭގެ ބައެއް ސަރަހައްދުތަކުގައި ފެންބޮޑުވެ ބައެއް ގެތަކަށް ފެން ވަންނަމުންދާތީ އެމްއެންޑީއެފް މާލޭ އޭރިއާ ކޮމާންޑުން މިހާތަނަށް 48 ގެއެއްގައި 136 ވެލި ބަސްތާ ޖަހައިދީފައިވާ ކަމަށް އެމްއެންޑީއެފް އިން ބުންޏެވެ.

މިހާރު ރާއްޖެ އަށް ކުރަމުން މި ދަނީ ހުޅަނގު މޫސުމުގެ ވިއްސާރައެވެ.

މެޓުން ލަފާކުރާ ގޮތުގައި ކުރިޔަށް އޮތް ފަސް ދުވަހު ވެސް ރާއްޖޭގެ ސަރަހައްދުގެ ބޮޑު ބަޔަކަށް ގުގުރުމާއެކު ބޯކޮށް ވިއްސާރަ ކުރާނެއެވެ. އާއްމު ގޮތެއްގައި ޖެހޭ ވައި އުތުރާއި މެދުރާއްޖެ ތެރޭގައި ހުންނާނީ ގަޑިއަކު 17 މޭލާ 27 މޭލާ ދެމެދުގައެވެ. ދެކުނުގައި އާއްމުވައި ހުންނާނީ ގަޑިއަކު 13 މޭލާއި 23 މޭލާއި ދެމެދުގައެވެ. ނަމަވެސް ވިލާގަނޑުގައި ގަޑިއަކު 60 މޭލަށް ވައިގަދަވާނެ ކަމަށް ލަފާ ކުރެއެވެ.

އެހެންކަމުން ރާއްޖޭގެ ހުރިހާ ސަރަހައްދެއްގެ ކަނޑުތައް ވެސް ގަދަވާނެ ކަމަށާއި އަދި ވިލާގަނޑުގައި އިތުރަށް ކަނޑުތައް ގަދަވާނެ ކަމަށް މެޓުން ލަފާކުރެއެވެ. އަދި ދިޔަވަރު ބޮޑުވާ ގަޑިތަކުގައި އުދަ އެރުން ވެސް އެކަށީގެންވާ ކަމަށް ބުންޏެވެ.

މެޓުން ވަނީ ކަނޑުތައް ގަދަވާނެ ކަމަށް ލަފާ ކުރެވޭތީ މޫސުމަށް ސަމާލުކަން ދިނުމަށް އިލްތިމާސް ކޮށްފައެވެ.