ރަށްރަށުގައި އައިސްޕްލާންޓް ބެލެހެއްޓުން ފެނަކަ ކޯޕަރޭޝަނުން މިއަދުން ފެށިގެން ހުއްޓާލާފައިވާ ކަމަށް އެ ކުންފުނީގެ މެނޭޖިން ޑިރެކްޓަރު މުއާޒު މުހައްމަދު ރަޝީދު (މުއާ) މިއަދު ވިދާޅުވެއްޖެއެވެ.

ފެނަކަ ކޯޕަރޭންސުން މިއަދު ބޭއްވި ޕްރެސް ކޮންފަރެންސްގައި ވާހަކަ ދައްކަވަމުން މުއާޒު ވިދާޅުވީ އައިސްޕްލާންޓު ހިންގުން ހުއްޓާލީ އެތަންތަނުން ކުންފުންޏަށް ގެއްލުންވަމުންދާތީ ކަމަށާއި އައިސްޕްލާންޓުތަކުން އަހަރަކު 11 މިލިއަން ރުފިޔާގެ ގެއްލުންވަމުންދާ ކަމަށެވެ.

ކުންފުންޏަށް ދަރަނި ބޮޑުވާ ކަންތައްތައް ހުއްޓާލަން ނިންމާފައިވާ ކަމަށް ވިދާޅުވެ، މުއާޒު ވިދާޅުވީ މިއަދަކީ އައިސްޕްލާންޓުތައް ހިންގުން ހުއްޓާލަށް ފެނަކައިން ނިންމާފައިވާ ދުވަސް ކަމަށެވެ.

އައިސްޕްލާންޓުތައް ފެނަކައާ ހަވާލުކުރީ މިދިޔަ ސަރުކާރުންނެވެ. އެގޮތުން މިފްކޯއިން ބަލަހަައްޓަމުންދިޔަ އައިސްޕްލާންޓުތައް ވެސް ފެނަކައާ ހަވާލުކުރިއެވެ. އިތުރު ރަށްރަށުގައި އެޅި އައިސްޕްލާންޓުތަކާ އެކު 15 ރަށެއްގައި އައިސްޕްލާންޓް ހިންގުމަށް ފެނަކައާ މިދިޔަ ސަރުކާރުން ހަވާލުކުރިއެވެ.

މުއާޒު މިއަދު ވިދާޅުވީ ރަށްރަށުގައި ބީއެމްއެލްގެ އޭޓީއެމްތައް އެޅުން ވެސް އެ ކުންފުނިން ހުއްޓާލާފައިވާނެ ކަމަށެވެ.

އޭނާ ވިދާޅުވީ އާބާދީ ފެނަކައިން ކަރަންޓާއި ފެން ފޯރުކޮށްދެއްމުންދާ ބޮޑެތި ރަށްރަށުގައި މައްސަލަތަކެއް ކުރިމަތިވެފައިވާ ކަމަށާއި އެގޮތުން އައްޑޫ ސިޓީ އާއި ޅ. ހިންނަވަރާއި ޏ. ފުވައްމުލަކުގެ އިތުރުން ތިނަދޫ ސިޓީގައި މައްސަލަތަކެއް ކުރިމަތިވާ ކަމަށެވެ.

އައްޑޫގެ ކަރަންޓުގެ މައްސަލަ ހައްލު ކުރުމަށް "ޑީއީސީ" ކިޔާ ޗައިނާގެ ކުންފުންޏަކާ އެކު، އެއްބަސްވުމެއްގައި ސޮއިކޮށްފައިވާ ކަމަށާއި ދެ އަހަރުގެ ތެރޭގައި އެ ސިޓީގެ ކަރަންޓުގެ މައްސަލަ ހައްލު ކުރެވޭނެ ކަމަށް ފެނަކަ ކޯޕަރޭޝަންގެ އެމްޑީ ވިދާޅުވިއެވެ. އައްޑޫގެ ކަރަންޓު ހައްލު ކުރުމަށް އެ ސިޓީގައި އިމާރާތް ކުރަނީ 32 މެގަވޯޓުގެ

"ޑީއީސީން މި ބުނާ 32 މެގަވޯޓުގެ ޕަވާ ޕްލާންޓް އަޅުގަނޑުމެންނަށް އަޅާ ނިންމާލެވިގެން. ގާތްގަނޑަކަށް ދޮޅު އަހަރެއް ނުވަތަ ދެ އަހަރެއްގެ ތެރޭގައި އައްޑުއަށް ދާއިމީ ހައްލެއް ލިބޭނެ،" ފެނަކަ ކޯޕަރޭޝަންގެ ޗީފް ތެކްނިކަލް އޮފިސަރު ނާޝިތު ވިދާޅުވިއެވެ.