ހުޅުމާލެ ދެ ވަނަ ފިޔަވަހީގައި ބާރު ސްޕީޑުގައި ދުއްވާފައި ދިޔަ ކާރެއް ކޮންޓްރޯލުން ނެއްޓި، ސައިކަލުގައި މަޑުކޮށްގެން ހުރި ކަމާނުބެހޭ މީހާކަށް ބޮޑު އަނިޔާއެއްވި ނުރައްކާތެރި އެކްސިޑެންޓާ ގުޅިގެން ތިން މީހަކު ހައްޔަރުކޮށްފިއެވެ.

ފުލުހުން ބުނީ އެ އެކްސިޑެންޓާ ގުޅިގެން ތިން މީހަކު ހައްޔަރު ކުރީ ކޯޓު އަމުރެއްގެ ދަށުން ކަމަށެވެ. ހައްޔަރުކޮށްފައި ވަނީ ހ. ނޫރަންމާގެއާގެ، އިކުރާމުއްރަހުމާން އާއި މ. ލޭންޑް އޮފް ގާޑަން، އިބްރާހިމް އިކްރާމްގެ އިތުރުން، ގއ. ކަނޑުހުޅުދޫ، އާޒާދުގެ، ޖިނާހު އިސްމާއިލެވެ.

ހުޅުމާލެ ވިނަރެސް ފްލެޓް ކައިރީގައި އިއްޔެ ހިނގި އެ އެކްސިޑެންޓުގެ ވީޑިއޯއިން ފެންނަ ގޮތުން ބާރު ސްޕީޑުގައި ދުއްވާފައި ދިޔަ، ކާރެއް ކޮންޓްރޯ ނުވެ، ގޮސް އަރާފައި ވަނީ މަގުގެ އެއް ފަރާތުގައި މަޑުކޮށްގެން އިން މީހެއްގެ ސައިކަލަށެވެ.

ކާރުން ޖެހި ސައިކަލުގެ މަތީގައި އިން މީހާ ބުރައިގެން، ވައިގެތެރެއަށް ވިއްސައިގެންދާ މަންޒަރު ވީޑިއޯއިން ފެނެވެ. އެ މީހާ ވިއްސައިގެން ގޮސް، ޖެހެނީ ޕޭވްމަންޓު މައްޗަށެވެ. ކާރު އެ ދިޔަ ބާރު މިނުގައި ގަހެއްގައި ޖެހި ގަސް ވެސް ވެއްޓޭ މަންޒަރު ވީޑިއޯއިން ފެނެއެވެ.

އެ އެކްސިޑެންޓުގައި އަނިޔާވި މީހާއަށް ފަރުވާ ދީފައި ވަނީ ހުޅުމާލެ ހޮސްޕިޓަލުންނެވެ. އެއަށްފަހު އިތުރު ފަރުވާއަށް އައިޖީއެމްއެޗަށް ވަނީ ބަދަލުކޮށްފައެވެ. އެ ހޮސްޕިޓަލުން ބުނެފައި ވަނީ އޭނާ އިމަޖެންސީ ރޫމުން ވޯޑަށް އިއްޔެ ބަދަލުކޮށްފައިވާ ކަމަށާއި އޭނާގެ ހާލު ސްޓޭބަލް ކަމަށެވެ.