ކުޑަކުދިންނާ ގުޅޭ ގޮތަށް “ބޮޑުތަކުރުފާނު” ވާހަކަ ނެރެފި

ކުޑަކުދިންގެ އުމުރާއި ގުޅޭ ގޮތަށް ލިޔެފައިވާ "ބޮޑުތަކުރުފާނު" ވާހަކަ ނެރެފި އެވެ.

ކުރީގެ ނޫސްވެރިޔާ އައިމިނަތު ނިޔާޒާ ލިޔެފައިވާ ބޮޑުތަކުރުފާނު ވާހަކައަކީ، ދިވެހިރާއްޖެ ޕޯޗުގީޒުންގެ އަޅުވެތި ކަމުން ސަލާމަތް ކޮށްދެއްވުމަށް ކުރެއްވި ހަނގުރާމައާ ގުޅޭގޮތުން ކުޑަކުދިންނަށް ހާއްސަކޮށްގެން ނެރެފައިވާ ވާހަކަ އެވެ.

އުމުރުން ހައަހަރާއި ދިހަ އަހަރުގެ ކުދިންނަށް ހާއްސަކޮށްގެން ނެރެފައިވާ މިވާހަކަ "އަލިފްވާވު ޕޭޖް" ޕޭޖުން އޮންލައިން ކޮށް ގަންނަން ލިބޭނެ އެވެ. އަދި އަސްރަފީ ބުކްޝޮޕާއި ބުކް ރަން އަދި ތިނަދޫ ބުކްސް އެންޑް ޓޯއީސް އިން ވެސް މިހާރު ގަންނަން ލިބޭނެ އެވެ.

މިފޮތުގެ ކުރެހުންތައް ކުރަހާދީފައިވަނީ ތުއްތު މުސްލިމްގެ ނަމުގައި ވާހަކަ ލިޔަމުން އަންނަ ފާތިމަތު ޝުއާއު އެވެ.

ޕޯޒުގީޒުންގެ އަނިޔާވެރިކަމުގައި ދިވެހިރާއްޖެ 15 އަހަރާއި ހަ މަސް ދުވަހު އޮތް އޮތުން ނިމުމަކަށް ގެނެސްދެއްވި ހިކުމަތްތެރި ބަތަލު ބޮޑުތަކުރުފާނުގެ ވާހަކައަކީ މިއަދުގެ ޖީލުގެ ކުދިންނަށް އާ ވާހަކަތަކެކެވެ. ބޮޑުތަކުރުފާނުގެ ހިކުމަތާއި ހިތްވަރުގަދަ ކަމުގެ ވާހަކަ މިއަދުގެ ޖީލުގެ ކުދިންނަށް ގެނެސް ދިނުމުގެ މަގުސަދުގައި ލިޔެފައިވާ މިވާހަކައިން ކުދިންނަށް ބޮޑުތަކުރުފާނާއި ގުޅޭ މައުލޫމާތު އެނގިގެންދާނެ ކަމަށް ނިޔާޒާ ވިދާޅުވި އެވެ.

"ގައުމުގެ މިނިވަންކަމަށް ލެއިން ގުރުބާންވި ގިނަ ބަތަލުންގެ ވާހަކަ މިއަދުގެ ކުދިންނަކަށް ނޭނގެ. އެފަދަ އަބުތާލުންގެ ވާހަކަތައް އާންމުކޮށް ކިޔައިނުދެވޭ. އުންމީދަކީ ބޮޑުތަކުރުފާނު ވާހަކައިން ކުދިންނަށް، މުހިންމު މައުލޫމާތުތަކާއި އާ ވާހަކަތަކެއް ދަސްވުން،" ނިޔާޒާ ވިދާޅުވި އެވެ.

ކުރިއަށް އޮތް ތަނުގައި ވެސް މިފަދަ އާވާހަކަތަކެއް ފެނިގެން ދާނެ ކަމަށް ނިޔާޒާ ވިދާޅުވި އެވެ.

ސުލްތާން ޣާޒީ މުހަންމަދު ތަކުރުފާނަކީ މީލާދީން 1573 ން 1585 އަށް ދިވެހިރާއްޖޭގައި ރަސްކަން ކުރެއްވި ރަދުންނެވެ. ދިވެހި ތާރީޚްގައި މިރަދުން މަޝްހޫރު ވެފައިވަނީ ބޮޑުތަކުރުފާނުގެ ނަމުންނެވެ. ބޮޑުތަކުރުފާނަކީ ޕޯޗުގީޒުންގެ އަތްދަށުން ދިވެހިރާއްޖެ ސަލާމަތްކޮށްދެއްވި ހިތްވަރުގަދަ ބަތަލެވެ. ބޮޑު ތަކުރުފާނަކީ ދިވެހީން ފަހުރުވެރިވާ ގައުމީ ބަތަލެވެ. ގައުމީ ދުވަސް ހާއްސަވެފައިވާ ބަތަލު ވެސް މެއެވެ.