ހައްޖު ކޯޕަރޭޝަންގެ ހަވާލުގައި މިއަހަރު ހައްޖަށް ދިޔަ ހުރިހާ ހައްޖުވެރިން ވެސް ވެކްސިން ފުރިހަމަކޮށްފައިވާ ކަމަށް އެ ކޯޕަރޭޝަނުން ބުނެފިއެވެ.

ހައްޖު ކޯޕަރޭޝަންގެ މެނޭޖިންގ ޑިރެކްޓަރު މުހައްމަދު ޝަކީލް މިރޭ ނެރުއްވި ނޫސްބަޔާނެއްގައި ވިދާޅުވީ ސައުދީއަށް ދަތުރުކުރި ހުރިހާ ހައްޖުވެރިން ވެސް ސައުދީ ހައްޖު މިނިސްޓްރީގެ ގައިޑްލައިންތަކާ އެއްގޮތަށް ޓްރެވެލް ވެކްސިންގ ކަމުގައިވާ ޕޯލިއޯ، މެނިންގޖައިޓިސް އަދި އިންފްލުއެންޒާ ވެކްސިން ފުރިހަމަކޮށްފައިވާ ކަމަށެވެ.

"ހައްޖުވެރިންގެ ސަލާމަތާއި ރައްކާތެރިކަމަކީ މޯލްޑިވްސް ހައްޖު ކޯޕަރޭޝަންގެ މެނޭޖުމަންޓުން އެންމެ ހާއްސަ ސަމާލުކަމެއްދޭ ކަންތައް ކަމުގައި ވެސް މިފުރުސަތުގައި ދަންނަވަމެވެ،" ޝަކީލް ނެރުއްވި ބަޔާނުގައިވެއެވެ.

ހައްޖު ކޯޕަރޭޝަނުން މިގޮތަށް ބުނެފައި މި ވަނީ ނުރައްކާތެރި މެނިންޖައިޓިސް ބަލީގައި މަޝްހޫރު ފުޓުބޯޅަ ކުޅުންތެރިޔާ އަލީ އާރިފް (ބަކާ) މިއަދު ނިޔާވެފައިވަނިކޮށެވެ. އޭނާ ނިޔާވީ ހައްޖުގެ އަޅުކަމަށްފަހު، ރާއްޖެ އައިތަނުން ނޭވާލުމުގެ މައްސަލަތަކެއް ދިމާވެގެން އޭޑީކޭގެ އައިސީޔޫގައި ފަރުވާދެމުންދަނިކޮށެވެ.

ރާއްޖޭގައި ހުންނަ ސައުދީ އެމްބަސީ މެދުވެރިކޮށް، ސައުދީ ރަސްގެފާނުގެ ހާއްސަ ދައުވަތުގައި ހައްޖަށް ދިޔަ މީހުން-- ފޮޓޯ/ ސައުދީ އެމްބަސީ

އާރިފް ހައްޖުގެ އަޅުކަން އަދާކުރީ ދިވެހިރާއްޖޭގައި ހުންނަ ސައުދީ އެމްބަސީން ދެއްވި، ސައުދީ ރަސްގެފާނުގެ ހާއްސަ ދައުވަތުގައި ހައްޖަށް ފޮނުވި މީހުންގެ ތެރޭގައި ހިމެނިގެންނެވެ.