ރާއްޖޭގެ ގައުމީ ފުޓުބޯޅަ ޓީމާއި އަދިވެސް ރާއްޖޭގެ މަޝްހޫރު ފުޓުބޯޅަ ކްލަބުތަކަށް ކުޅުނު މުހައްމަދު އާރިފް (ބަކާ) ނިޔާވުމަކީ ދިވެހި ހުރިހާ ރައްޔިތުންނަށް ވެސް ލިބިގެން ދިޔަ ހިތާމައެއް ކަމަށް ރައީސް ޑރ. މުހައްމަދު މުއިއްޒު ވިދާޅުވެއްޖެއެވެ.

ރައީސް މުއިއްޒު އެކްސްގައި ކުރެއްވި ޕޯސްޓެއްގައި ވިދާޅުވީ ބަކާ އަކީ ދިވެހިރާއްޖޭގައި ކުޅިވަރު ކުރިއެރުވުމަށް އަދި ވަކީން ހާއްސަކޮށް ފުޓްބޯޅައަށް ގިނަގުނަ ހިދުމަތްތަކެއް ކޮށްދެއްވައި، ގައުމަށް ފަހުރުވެރި ނަންތަކެއް ހޯއްދަވައިދެއްވާފައިވާ ހުނަރުވެރި ކުޅުންތެރިޔެއް ކަމަށެވެ.

"‏މި ހިތާމަވެރި ވަގުތު މަރްހޫމް މުހައްމަދު އާރިފްގެ އާއިލާއަށް ކެތްތެރިކަން ދެއްވުން އެދެމެވެ" ރައީސް ވިދާޅުވިއެވެ.

ބަކާ ނިޔާވިއިރު އުމުރަކީ 38އެވެ. އޭނާ ނިޔާވީ ހައްޖުގެ އަޅުކަން އަދާ ކުރުމަށް ފަހު އެނބުރި ރާއްޖެ އައި ފަހުން ބަލިވެ ހާލު ސީރިއަސްވެގެން ރޭ އޭޑީކޭ ހޮސްޕިޓަލަށް ގެންގޮސް އައިސީޔޫގައި ފަރުވާ ދެމުން ދަނިކޮށެވެ.