މިފްކޯއަށް ކިރުވި މަހަށް ފައިސާ ނުދީގެން، ހުޅުމީދޫގައި އައްޑޫ މަސްވެރިން ކުރަމުންދާ މުޒާހަރާގައި ރާއްޖޭގެ އެކި ކަންކޮޅުތަކުގެ މަސްވެރިން ބައިވެރިވުމަށް އިދިކޮޅު އެމްޑީޕީން މިއަދު ގޮވާލައިފިއެވެ.

އެމްޑީޕީން އެގޮތަށް ގޮވާލީ މަޖިލީހުގެ އިދާރާގައި އެ ޕާޓީގެ ޕާލަމެންޓްރީ ގްރޫޕުން މިއަދު ބޭއްވި ޕްރެސް ކޮންފަރެންސެއްގައި ކެންދޫ ދާއިރާގެ މެމްބަރު މައުރޫފު ޒާކިރު (މާއްޓެ) އެވެ.

ރައްޔިތުންގެ ވޯޓު ހޯދުމަށް ނުފުއްދޭވަރުގެ ބޮޑެތި ވައުދުތައް މި ސަރުކާރުންވެފައިވާ ކަމަށާއި އެ ވައުދުތައް ނުފުއްދުމުން ގޯސްވަނީ ރާއްޖޭގެ މާލީ ހާލަތާއި މިފްކޯ ކަމަށް މައުރޫފް ވިދާޅުވިއެވެ.

"މިއަދު ދިމާވެގެން މި އުޅެނީ ވޯޓުގެ ބޭނުމުގައި މަސްވެރިންގެ ލޮލުގައި އަނދުން އަޅުވައި، މަސްވެރިންނަށް ނުފެއްދޭ ވަރުގެ ބޮޑެތި ވައުދުތައް މި ވަނީ. އެ ވައުދުތައް ވެފައި، މަސްވެރިން އެކަންކަން ހޯދަން ޑިމާންޑުކުރީމަ މި ގޯސްވަނީ މާލީ ހާލަތު، ކުންފުނި ނުވަތަ މަސްވެރިން. އެއީ އެންމެ ރަނގަޅު ގޮތެއް ނޫން،" އެމްޑީޕީ ޕީޖީ ގްރޫޕުގެ ސްޕޯކްސްޕާސަންކަން ވެސް ކުރައްވާ މައުރޫފް ވިދާޅުވިއެވެ.

މޯލްޑިވްސް ޓްރޭޑް ޔޫނިއަން (އެމްޓީޔޫސީ) ރައީސް ކަމާއި ޓޫރިޒަމް އެމްޕޮލޮއީސް އެސޯސިއޭޝަން (ޓީމް)ގެ ސެކަރެޓަރީ ޖެނަރަލްކަން ވެސް ކުރައްވާ މައުރޫފު މިއަދު ވިދާޅުވީ މަސައްކަތުގެ އުޖޫރަ ނުލިބޭނަމަ، އެ ހޯދުމަަށްޓަކާ މުޒާހަރާކޮށްގެން ވެސް އުޖޫރަ ހޯދަންޖެހޭނެ ކަމަށެވެ.

ރާއްޖޭގެ ހުރިހާ މަސްވެރިން ގުޅިގެން މުޒާހަރާ ކުރަންޖެހޭ ކަމަށް ވިދާޅުވެ، މައުރޫފް ގޮވާލެއްވީ އައްޑޫ މުޒާހަރާގައި ވީހާވެސް ގިނަ މަސްވެރިން ބައިވެރިވުމަށެވެ.

"ވީހާ ވެސް ގިނަ މަސްވެރިން އައްޑޫ މުޒާހަރާގައި ވެސް ބައިވެރިވުމަކީ އެއީ މިހާރު ކުރަމުންދާ މުޒާހަރާއަށް އިތުރު ހިތްވަރު ލިބި، ސަރުކާރަށް މަޖުބޫރުވުން އިތުރުވެގެންދާނެ ފައިސާ ދިނުމަށްޓަކާ. އެއީ ރަނގަޅު ގޮތް،" މައުރޫފް ވިދާޅުވިއެވެ.

އައްޑޫ، ހުޅުމީދޫ މިފްކޯ މަސް ފެކްޓްރީގައި މުޒާހަރާ ފެށީ މިދިޔަ ހުކުރު ދުވަހުގެ މެންދުރުފަހުއެވެ. އެ މުޒާހަރާއަށް މިއަދަށް ތިން ދުވަސްވެއްޖެވެ. މުޒާހަރާއާ ގުޅިގެން މަސް ކާރުކާނާގެ މަސައްކަތް ވަނީ ހުއްޓިފައެވެ. ފުލުހުން ރޭ ނެރުނު ބަޔާނެއްގައި ބުނީ އެތަނުގެ މަސައްކަތް ފެށޭނެ މާހައުލެއް ގާއިމުކުރުމަށް މަސައްކަތް ކުރަމުންދާ ކަމަށެވެ.

އެމްޑީޕީން ބުނީ އައްޑޫގައި މުޒާހަރާ ކުރަމުންދާ ދޯނިތަކުގައި 345 މަސްވެރިން އެބަތިބި ކަމަށެވެ. މުޒާހަރާގައި ތިބި މަސްވެރިންނަށް 11.8 މިލިއަން ރުފިޔާ ސަރުުކާރުން ދޭންޖެހޭ ކަމަށް އެމްޑީޕީން ބުންޏެވެ.

މަޖިލީހުގެ އިދާރާގައި މިއަދު މެންފުރުފަހު ބޭއްވި ޕްރެސް ކޮންފަރެންސްގައި އެމްޑީޕީ ޕާލަމެންޓްރީ ގްރޫޕޫގެ ލީޑަރު އިބްރާހިމް ނާޒިލް ވިދާޅުވީ ފުލުހުންނާއި ސިފައިން މެދުވެރިކޮށް، މުޒާހަރާ ކުރާ ތަނުން މަސްވެރިން ފޮނުވާލުމަށް މަސައްކަތް ކުރަމުންދާ ކަމަށެވެ. އަދި ވިދާޅުވީ މަސްވެރިންނަށް ފައިސާ ނުދޭތާ 80 ވަރަކަށް ދުވަސްވެއްޖެ ކަމަށާއި ފުލުހުން މެދުވެރިކޮށް ސަރުކާރުން މިހާރު މަސައްކަތް ކުރަމުންދަނީ މަސްވެރިންގެ ހައްގު ނިގުޅައިގަތުމަށް ކަމަށް ނާޒިލް ވިދާޅުވިއެވެ.

އެމްޑީޕީ ޕާލަމެންޓްރީ ގްރޫޕުން މަޖިލީހުގައި މިއަދު ބޭއްވި ޕްރެސް ކޮންފަރެންސްގައި މައިނޯރިޓީ ލީޑަރު އިބްރާހިމް ނާޒިލް ވާހަކަ ދައްކަނީ-- ފޮޓޯ/ މަޖިލިސް

އޭނާ ވިދާޅުވީ މާދަމާ މަޖިލިސް ފެށޭއިރު، މަސްވެރިންގެ ހައްގުގައި މަޖިލީހުގެ ތެރެއިން ކުރެވެން ހުރި މަސައްކަތް ކުރައްވާ ކަމަށެވެ. އެގޮތުން މަސްވެރިންގެ ހައްގުގައި ކުއްލި މައްސަލައެއް މަޖިލީހަށް ހުށަހަޅުއްވާނެ ކަމަށް ވިދާޅުވިއެވެ.

ނިމިދިޔަ ސަރުކާރުގައި މަސްވެރިންނަށް ދޭންޖެހޭ ފައިސާ ކޮންމެ ހަފްތާއެއް ނިމި، ޖެހިގެން އަންނަ ހޯމަ ދުވަހުގެ ރޭ ދަންވަރު 12:00 ކުރިން މަސްވެރިންނަށް ފައިސާ ދީ ހަލާސްކުރަމުންދިޔަ ކަމަށް ނާޒިލް މިއަދު ފާހަގަ ކުރެއްވިއެވެ.

މަސްވެރިންނަށް ދޭންޖެހޭ 120 މިލިއަން ރުފިޔާގެ ތެރެއިން އީދުގެ ކުރިން ދޫކޮށްފައިވަނީ 40 މިލިއަން ރުފިޔާއެވެ. ބާކީ 80 މިލިއަން ރުފިޔާ މަސްވެރިންނަށް އަދި ނުދެވެއެވެ.