ކަރަންޓު ބިލާ ގުޅޭ ޝަކުވާއެއް އޮތް ނަމަ ހުށަހަޅަން އެދިއްޖެ

މިމަހުގެ ކަރަންޓު ބިލާ ގުޅޭ ގޮތުން ޝަކުވާއެއް އޮތް ނަމަ ހުށަހެޅުމަށް ސްޓެލްކޯ އިން އެދިއްޖެއެވެ.

ސްޓެލްކޯއިން މިއަދު އެކްސްގައި ކުރި ޕޯސްޓެއްގައި ބުނީ ކަރަންޓު ބިލުތަކާ ގުޅިގެން ހުށަހަޅަން ބޭނުންވާ ޝަކުވާތައް އެ ކުންފުނީގެ ކަސްޓަމާ ސާވިސް ނަމްބަރު 7788438 އަށް ވަޓްސްއަޕް ނުވަތަ ޓެލެގްރާމް މެދުވެރިކޮށް ހުށަހެޅޭނެ ކަމަށެވެ.

އަދި [email protected] އިން އީމެއިލް މެދުވެރިކޮށް ވެސް ޝަކުވާ ހުށަހެޅޭނެ ކަމަށް އެ ކުންފުނިން ބުންޏެވެ.

ސްޓެލްކޯ އިން ބުނީ ކަސްޓަމަރުން ހުށަހަލާ ޝަކުވާތަކަށް ގިނަވެގެން 24 ގަޑިއިރު ތެރޭ ޖަވާބުދާރީ ވުމަށް އެ ކުންފުނިން މަސައްކަތް ކުރަމުން އަންނަ ކަމަށެވެ.

މިމަހުގެ ކަރަންޓު ބިލު ބޮޑު ކަމަށް ބުނެ ގިނަ ބަޔަކު އަންނަނީ ސޯޝަލް މީޑިއާގައި ޝަކުވާ ކުރަމުންނެވެ. ބައެއް ފަރާތްތަކުން ބުނީ މިމަހުގެ ގިނަ ދުވަހު ވިއްސާރަވި ނަމަވެސް ކަރަންޓު ބިލަށް ބަދަލު ނާންނަ ކަމަށެވެ. އެގޮތަށް ބައެއް މީހުން ބުނެފައި ވަނީ ނިމިދިޔަ ރޯދަމަހުގެ ކަރަންޓު ބިލާއި ގުޅޭ ގޮތުން ސްޓެލްކޯ އިން ބުނެފައިވާ ވާހަކަތަކާއި ގުޅިގެންނެވެ.

ކަރަންޓު ބިލުތައް އާންމުކޮށް ބޮޑުވަނީ އާދައާ ހިލާފަށް ހޫނު ދުވަސްވަރުގައެވެ. އެއީ ކޮންމެ އަހަރެއްގެ މާޗު، އެޕްރީލް އަދި މެއި މަހެވެ.

ނަމަވެސް މިދިޔަ ދުވަސްތައް ރާއްޖޭއަށް ވިއްސާރަކުރިއެވެ. އާންމުން ސުވާލުކުރަނީ ވިއްސާރަ ދުވަސްވަރު ވެސް ބިލްވީ ބޮޑު ވަނީ ކީއްވެގެންތޯއެވެ؟

އެކަމާ ގުޅިގެން ‏ސްޓެލްކޯއިން ބުނީ އެންމެ ފަހުގެ ބިލްތަކުގައި ހިމެނެފައި ވާނީ ވިއްސާރައިގެ މަދު ދުވަސްކޮޅެއް ކަމަށާއި ބިލިންގ ޕީރިއޭޑް ބިލްތަކުގައި ހިމަނާފައިވާނެ ކަމަށެވެ.

"މިދިޔަ މަހު ރީޑިންގ ނެގި ތާރީހާއި އެންމެ ފަހުން ރީޑިންގ ނެގި ތާރިހް. މި ޕީރިއޭޑް ބަލާލީމަ އެ ދުވަސްވަރު އެއީ ހޫނު ދުވަސްވަރެއްކަން އިނގޭނެ. މިއީ ސްޓެލްކޯއިން ބުނާ ވާހަކައެއް ނޫން. މެޓް އޮފީހާއި، އަމީނީ މަގު ތާރަގަނޑުގައި ލާފަހުރި ދަވާދު ވިރިފަހުރިތަންވެސް އަދި މި ހޫނު އެންމެންވެސް އިހުސާސް ކުރާނެކަން ޔަގީން. ވާރޭ ވެހުމުގެ ކުރިން އެވާ ދިލަ ހޫނުވެސް އެއީ އެންމެން އިހުސާސްކޮށްފަ ހުންނާނެ އެއްޗެއް،" ސްޓެލްކޯ ބުނެފައިވެއެވެ.