ވ. އަތޮޅު ކައުންސިލާ މަޝްވަރާ ކުރުމެއް ނެތި އެ އަތޮޅު ފަޅެއް ޓޫރިޒަމްގެ ބޭނުމަށް ކުއްޔަށް ދޫކުރާތީ ވ. އަތޮޅު ކައުންސިލްގެ ރައީސް ކަންބޮޑުވުން ފާޅު ކުރައްވައިފި އެވެ.

ލާ މަރުކަޒީ ގާނޫނު ބުނާގޮތުން ދައުލަތުގެ ބޭނުންތަކަށް ރަށްތަކާއި ފަޅުތައް ދައުލަތުން ކުއްޔަށް ދޭނަމަ އެ އަތޮޅެއްގެ ކައުންސިލްގެ ލަފާ ހޯދަން ޖެހޭނެއެވެ.

ޓޫރިޒަމް މިނިސްޓްރީން އިއްޔެ ވަނީ 14 ރަށަކާއި ތިން ފަޅެއް ޓޫރިޒަމްގެ ބޭނުމަށް ކުއްޔަށް ދިނުމަށް އިއުލާންކޮށްފަ އެވެ. އޭގެ ތެރޭގައި ވ. އަތޮޅުގެ 0.6 ހެކްޓަރުގެ ފަޅެއް ވެސް ހިމެނެއެވެ. އެތަނުގެ އިކުއިޒިޝަން ކޮސްޓްގެ ގޮތުގައި ސަރުކާރުން ކަނޑައަޅާފައިވަނީ 729,000 ޑޮލަރު (11 މިލިއަން ރުފިޔާ)އެވެ.

ޓޫރިޒަމް މިނިސްޓަރު ފައިސަލް-- ފޮޓޯ/ ރައީސް އޮފީސް

އެކަމާ ގުޅިގެން އެ އަތޮޅު ކައުންސިލްގެ ރައީސް ޝުޖާއު އަލީ މިއަދު ކުރެއްވި ޓްވީޓެއްގައިވަނީ ލާ މަރުކަޒީ ގާނޫނާ ހިލާފަށް ކައުންސިލްގެ ލަފައެއް ނެތި އެކަން ސަރުކާރުން ކުރާތީ ކުށްވެރި ކުރައްވާ ކަމަށެވެ.

އެ ލިސްޓުގައި ދެން ހިމެނެނީ ކ. އަތޮޅުގެ ދެ ފަޅަކާއި ޅ. އަތޮޅުގެ ތިން ރަށަކާއި ތ. އަތޮޅުގެ ތިން ރަށަކާއި ލ. އަތޮޅުގެ ތިން ރަށެއްގެ އިތުރުން ހދ. އަތޮޅުގެ ރަށަކާއި ށ. އަތޮޅުގެ ރަށަކާއި ރ. އަތޮޅުގެ ރަށަކާއި އއ. އަތޮޅުގެ ރަށަކާއި ގއ. އަތޮޅުގެ ރަށެއް އަދި ގދ. އަތޮޅުގެ ރަށެކެވެ.

ވ. އަތޮޅު ފަޅެއް ކުއްޔަށް ދޭތީ އެ އަތޮޅު ކައުންސިލްގެ ރައީސް ކަންބޮޑުވުން ފާޅު ކުރެއްވިއިރު ކުރީގެ ސަރުކާރުގެ ދުވަސްވަރު ވެސް އެ ކައުންސިލްގެ ލަފައެއް ނެތި ވ. ފޮއްތެޔޮ ފަޅު ކުއްޔަށް ދޭން ސަރުކާރުން ނިންމުމުން އެކަމާ ދެކޮޅަށް އެ ކައުންސިލުން ސިވިލް ކޯޓުގައި ދައުވާކުރިއެވެ. އެ މައްސަލަ އަދިވެސް އޮތީ ކޯޓުގައެވެ.