ތިލަފުށިން ފުރައިގެން މ. އަތޮޅުގެ ރިސޯޓަކަށް ތިން މީހުންނާއެކު ދަތުރު ކުރަމުން ދިޔަ ދޯނި ހޯދުމަށް ބޮޑު ސަރަހައްދެއް ބަލައިފިއެވެ.

އެ ދޯނި ދަތުރު ކުރަމުން ދިޔައީ މެދުފުށި އައިލެންޑު ރިސޯޓަށެވެ. “AAA-37” ނަމަކަށް ކިޔާ އެ ދޯނީގައި ތިން މީހުން ތިބި ކަމަށާއި އެ ދޯނި ތިލަފުށިން ފުރީ މިދިޔަ ހުކުރު ދުވަހުގެ ހެނދުނު 6:00 ހާއިރު ކަމަށް އެމްއެންޑީއެފް އިން އިއްޔެ ބުންޏެވެ.

ދޯނީގެ ހަބަރެއް ނުވެގެން ކޯސްޓްގާޑަށް ރިޕޯޓު ލިބުނީ މިދިޔަ ހުކުރު ދުވަހުގެ ހަވީރު 5:20 ގައި ކަމަށާއި އެ ދޯނި ހޯދުމުގެ މަސައްކަތުގައި އެމްއެންޑީއެފް ކޯސްޓްގާޑް ޝިޕް ޝަހީދު އަލީ ހަރަކާތްތެރިވަމުން އަންނަ ކަމަށް ވެސް ބުންޏެވެ.

އަދި އެ ދޯނި ހޯދުމުގެ މަސައްކަތް މޯލްޑިވިއަންގެ ފްލައިޓެއްގެ އެހީގައި ވެސް ކުރަމުން އަންނަ ކަމަށް ބުންޏެވެ.

އެމްއެންޑީއެފް އިން މިއަދު ބުނީ އެ އޮޕަރޭޝަންގައި ކަނޑާއި ވައިގެމަގުން، މ. އަތޮޅު ރަތްމަންދޫގެ އިރުމަތީ ބިތުން ބޮޑު ސަރަހައްދެއް ބަލާފައިވާ ކަމަށެވެ.

އެގޮތުން ކަނޑާއި ވައިގެމަގުން 4519 ސްކެއަރ ނޯޓިކަލް މޭލު ސަރަހައްދެއް ބަލާފައިވާ ކަމަށް ބުންޏެވެ. އެ ދޯނިން ދަތުރުކުރީ ބަންގްލަދޭޝް ތިން މީހުންނާ ދިވެއްސަކާއެކު ޖުމްލަ 4 މީހުން ކަމަށް ބުނެއެވެ.