އަނިޔާވެރިކަން އިޔާދަވާން ދިވެހިން ފުރުސަތެއް ނުދޭނެ: އަލީ ޒާހިރު

އަނިޔާވެރިކަން އަލުން އިޔާދަވުމަށް ދިވެހި ރައްޔިތުން ފުރުސަތު ނުދޭނެ ކަމަށް ރައީސް އޮފީހުގެ ޗީފް އޮފް ސްޓާފް އަލީ ޒާހިރު ވިދާޅުވެއްޖެއެވެ.

އަލީ ޒާހިރު ކުރެއްވި ޓްވީޓެއްގައި މިއަދު ވިދާޅުވީ ކުރީ ސަރުކާރުގެ [ރައީސް ޔާމީންގެ ސަރުކާރު] އަނިޔާވެރިކަން ހަނދާން ނެތޭހާ ދުވަހެއް އަދި ނުވާ ކަމަށާއި އެ އަނިޔާވެރިކަމަށް ދާން ދިވެހިން ފުރުސަތު ނުދޭނެ ކަމަށެވެ.

އަލީ ޒާހިރު ވިދާޅުވީ ރިޔާސީ އިންތިހާބުގެ ދެވަނަ ބުރުގައި ވޯޓުލާން ނިކުންނަ މީހުންގެ އަދަދު މަތިވާނެ ކަމަށެވެ.

"އިރާދަކުރެއްވިއްޔާ ކެންޑިޑޭޓު ނަންބަރު ތިނެއް އިބްރާހީމް މުހައްމަދު ސޯލިހް ފަސޭހަކަމާއެކު މިބުރު ކާމިޔާބު ކުރައްވާނެ،" އަލީ ޒާހިރު ވިދާޅުވިއެވެ.

އަލީ ޒާހިރަކީ އަދާލަތު ޕާޓީ އަށް ނިސްބަތްވާ ބޭފުޅެކެވެ. މިހާރުވެސް ސަރުކާރު ކޯލިޝަންގައި ހިމެނޭ އަދާލަތު ޕާޓީން މިފަހަރުގެ ރިޔާސީ އިންތިހާބުގައި ވެސް ކުރިޔަށް ދާން ނިންމީ އެމްޑީޕީއާއެކުގައެވެ.

ރިޔާސީ އިންތިހާބުގެ ދެވަނަ ބުރު ބޭއްވުމަށް ހަމަޖެހިފައި ވަނީ މިމަހުގެ 30ވަނަ ދުވަހުއެވެ. ފުރަތަމަ ބުރުގައި އެންމެ ގިނަ ވޯޓު ލިބިވަޑައިގަތީ އިދިކޮޅު ޕީއެންސީގެ ރިޔާސީ ކެންޑިޑޭޓު ޑރ. މުހައްމަދު މުއިއްޒަށެވެ.