ކުރިޔަށް އޮތް ރިޔާސީ އިންތިހާބުގައި ވާދަ ކުރައްވާ ސިޔާސީ ޕާޓީތަކުގެ ތެރެއިން ކޯލިޝަނެއް ނުހެދި ދިގުލައިގެން ދިޔައީ އެންމެން ވެސް ވެރިކަން ބޭނުންވާތީ ކަމަށް އެމްޑީޕީގެ ރިޔާސީ ކެންޑިޑޭޓު އަދި ރައީސުލްޖުމްހޫރިއްޔާ އިބްރާހީމް މުހައްމަދު ސޯލިހް ވިދާޅުވެއްޖެއެވެ.

ރިޔާސީ އިންތިހާބުގައި ކޯލިޝަނެއްގެ ތެރެއިން ނިކުމެ އޮތީ ހަމައެކަނި އެމްޑީޕީއެވެ. އެޕާޓީން ވަނީ އެމްޑީއޭ އަދި އަދާލަތު ޕާޓީއާއެކު ކޯލިޝަން ހަދައިފައެވެ.

އެހެން ޕާޓީތަކަށް ވެސް އެ ދައުވަތު ރައީސް ސޯލިހް ދެއްވި ނަމަވެސް، އެ ޕާޓީތަކުން އެ ދައުވަތު ގަބޫލެއް ނުކުރެއެވެ.

ބަދަލުގައި އެޕާޓީތަކުން ވަނީ އެކުގައި މަސައްކަތް ކުރުމާއި ގުޅޭ ގޮތުން ތަފާތު އެކި މަޝްވަރާ ބައްދަލުވުންތައް ބާއްވައިފައެވެ. ނަމަވެސް އެއްވެސް ނަތީޖާއެއް ނުނެރެވި، އިންތިހާބަށް ހުރިހާ ޕާޓީތަކަކުން ވަކިން ވާދަކުރިއެވެ.

"މާދަމާ ސޮއިކުރާނެއޭ ވެސް ހީވި. ނަމަވެސް ކޮންމެ މީހަކު ވަކިވަކިން. ބައިވެރިވާނެ އެކަކު ވެސް ނުވި،" ނ. މާފަރަށް ވަޑައިގެން އެރަށުގައި މިއަދު ބޭއްވި ކެމްޕެއިން ބައްދަލުވުމެއްގައި ރައީސް ވިދާޅުވިއެވެ.

ރައީސްގެ ވާހަކަފުޅުގައި މިފަހަރުގެ އިންތިހާބުގައި ވާދަކުރާ އެހެން ކެންޑިޑޭޓުން އިންތިހާބު ކާމިޔާބު ކުރައްވަން އުޅެނީ އަމިއްލަ ފައިދާ އަށް ކަމަށް ވިދާޅުވިއެވެ.

ރައީސް ވިދާޅުވީ އެއިން ބޭފުޅަކަށް ވެރިކަން ލިބިވަޑައިގެންނެވި ނަމަވެސް ރައްޔިތުންނަށް ކޮށްދޭނެ ކަމެއް ނޯންނާނެކަން ޔަގީން ކަމަށެވެ.

"އަމިއްލަ އަމިއްލައަށް ބޭނުންވާ ކަންތައްތަކެއް ނޫން ކަމެއް ކުރާނެ މީހެއް މި ފަހަރަކު، މި އިންތިހާބަކު އަޅުގަނޑު ނޫނީ ނެތް،" ރައީސް ވިދާޅުވިއެވެ.

ސިޔާސީ ގޮތުން ހާސިލް ކުރައްވަން ބޭނުންވާ އިތުރު ކަމެއް އެމަނިކުފާނުގެ ނެތް ކަމަށް ރައީސްގެ ވާހަކަފުޅުގައި ވިދާޅުވިއެވެ.