އެމެރިކާގެ ޕެންސިލްވޭނިއާށް ނިސްބަތްވާ ޕެޓްރީޝިއާ ކޮޕްޓާ ނަމަކަށް ކިޔާ މިހަކު ގެއްލުނީ 1992 ވަނަ އަހަރުއެވެ. އޭނާގެ ހަބަރެއް ނުވާތީވެ އާއިލާއިން ގަބޫލުކޮށްގެން ތިބީ ޕެޓްރީޝިއާ މަރުވީ ކަމަށެވެ. އެކަމަކު އޭގެ 30 އަހަރު ފަހުން މި ފަހުން އޭނާ ވަނީ ފެނިފައެވެ. ޕެޓްރީޝިއާ ފެނުނީ ކެރީބިއަން އައިލެންޑްގެ ޕުއެޓޯ ރިކޯގެ ނާސިން ހޯމެއްގައި ދިރިއުޅެމުން ދަނިކޮށެވެ.

ޕެންސިލްވޭނިއާ އިމަޖެންސީ ރެސްޕޮންސް ސެންޓަރާ ހަވާލާދީ ސީއެންއެން އިން ރިޕޯޓްކޮށްފައިވާ ގޮތުގައި އުމުރުން 83 އަހަރުގެ އަންހެން މީހާ އެންމެ ފަހުން ފެނިފައިވަނީ 1992 ވަނަ އަހަރު ޕިޓްސްބާގް އިންނެވެ.

އޭނާގެ އެއްވެސް ހަބަރެއް ނުވެ ހަތް އަހަރު ފާއިތުވެގެން ދިޔުމުން ފިރިމީހާ ބޮބް ނިންމީ ޕެޓްރީޝިއާ މަރުވީ ކަމަށެވެ. އަދި މަރުވި ކަމުގެ ސެޓްފިކެޓެއްވެސް ހެއްދިއެވެ.

"ވަރަށް ގިނަ ކަންތައްތަކަކާ ކުރިމަތިލާން ޖެހުނީ" ރިޓަޔާޑް ޓްރަކް ޑްރައިވަރެއް ކަމަށްވާ ބޮބް ބުންޏެވެ. "ކޮންމެ ފަހަރަކު އެމީހުންނަށް ކޮންމެވެސް ތަނަކުން ހަށިގަނޑެއް ފެނިދާނެ (އަހަރެން ހިތަށް އެރީ) އެއީ ޕެޓްރީޝިއާތަ؟ އެއީ ޕެޓްރީޝިއާތަ؟".

ބޮބް ބުނީ ޕުއެޓޯ ރިކޯއަށް ދިއުމުގެ ވާހަކަ ޕެޓްރީޝިއާ ވަރަށް ގިނައިން ދައްކާ އުޅުނު ކަމަށެވެ. ފުލުހުންގެ އޮފިޝަލުން ވިދާޅުވީ ޕެޓްރީޝިއާއާ ބެހޭ ގޮތުން އެންމެ ފުރަތަމަ މައުލޫމާތު ލިބުނީ އިންޓަނޭޝަނަލް ކްރިމިނަލް ޕޮލިސް އޯގަނައިޒޭޝަން (އިންޓަޕޯލް)ގެ އެޖެންޓަކާއި ސޯޝަލް ވޯކަރަކު މިދިޔަ އަހަރު ގުޅައި، ޕެޓްރީޝިއާ ކެއާ ހޯމެއްގައި އުޅޭ މައުލޫމާތު ހިއްސާކުރުން ކަމަށެވެ.

ފުލުހުން ބުނީ އެ އަންހެން މީހާއަކީ ޕެޓްރީޝިއާ ކަން އެނގުނީ ނުވަ މަސް ދުވަހުގެ ދިގު މަރުހަލާއެއްގެ ތެރެއިން ކަމަށެވެ. އެ މަރުހަލާގައި އޭނާގެ ޑީއެންއޭ ސާމްޕަލްތައް އޭނާގެ ކޮއްކޮ ގްލޯރިއާ ސްމިތު އާއި އޭނާގެ ދައްތަގެ އެއްގޮތްކަން ބެލުމަށް ޓެސްޓުތައް ހަދާފައިވާ ކަމަށެވެ.

ޕެޓްރީޝިއާ ގެއްްލުމުން ބޮބް، އިތުރު ކައިވެންޏެއް ނުކުރެއެވެ. އެކަމަކު ޕެޓްރީޝިއާ ދެކިލަން ޒިޔާރަތް ކުރުމުގެ ވިސްނުމެއް ނުގެންގުޅޭ ކަމަށް އޭނާ ބުންޏެވެ. އަދި މިހާރު މަސައްކަތް ކުރަނީ ކުރީގެ ކަންކަން ހަނދާން ނައްތާލަން ކަމަށްވެސް ބޮބް ބުންޏެވެ. ނަމަވެސް ޕެޓްރީޝިއާ ރަނގަޅަށް ބަލަހައްޓަމުން އަންނަކަން އެނގުމުން އުފާވާ ކަމަށްވެސް އޭނާ ބުންޏެވެ.

ޕެޓްރީޝިއާގެ ކޮއްކޮ ސްމިތް ހުރީ އޭނާގެ ދައްތައާ ބައްދަލުކުރާ ހިތުން ކެތްމަދުވެފައެވެ. "ދައްތަގެ ނަފްސާނީ ބަލީގެ ސަބަބުން ފޯނު މެދުވެރިކޮށެއް ވާހަކަ ނުދެއްކޭ" ސްމިތް ބުންޏެވެ. އޭނާ މިހާރު ބޭނުންވަނީ ވީހާވެސް އަވަހަކަށް ޕުއެޓްރިކޯއަށް ގޮސް ދައްތައާ ބައްދަލުކުރަންށެވެ.