މެކްސިކޯ ސިޓީ (ފެބުރުވަރީ 23, 2026): މެކްސިކޯގެ އެންމެ ބާރުގަދަ އަދި ނުރައްކާތެރި އެއް މަސްތުވާތަކެތީގެ ގްރޫޕް ކަމަށްވާ "ޖަލިސްކޯ ނިއު ޖެނެރޭޝަން ކާޓެލް" ސީޖޭއެންޖީގެ ލީޑަރު ނެމެސިއޯ "އެލް މެންޗޯ" އޮސެގުއެރާ ސެރްވާންޓޭޒް، މެކްސިކޯ ސިފައިން ހިންގި ޚާއްސަ އަސްކަރީ އޮޕަރޭޝަނެއްގައި މަރާލުމާއި ގުޅިގެން އެގައުމުގައި ހަމަނުޖެހުން ބޮޑުވެއްޖެއެވެ.

އާދީއްތަ ދުވަހު މެކްސިކޯގެ ހުޅަނގު ސްޓޭޓެއް ކަމަށްވާ ޖަލިސްކޯގެ ތަޕަލްޕާގައި ހިންގި މި އޮޕަރޭޝަނަށްފަހު، އެ ގައުމުގެ މަސްތުވާތަކެތީގެ ގްރޫޕްތަކުން ވަނީ މުޅި ސަރަހައްދުގައި ބޮޑެތި ހަމަނުޖެހުންތަކެއް ފަށާފައެވެ.

ހަމަނުޖެހުންތަކާއި "ނާކޯ" ބްލޮކޭޑްތައްއެލް މެންޗޯ މަރާލުމާ ގުޅިގެން އޭނާގެ ކާޓެލްގެ ހަނގުރާމަވެރިން ވަނީ ޖަލިސްކޯ، ގުއާނަޖުއާޓޯ، މިޗޯއާކަން އަދި ތަމައުލީޕަސް ފަދަ ސްޓޭޓްތަކުގައި ބަސްތަކާއި ޓްރަކްތަކުގައި ހުޅުޖަހައި، މަގުތައް ބަންދުކޮށްފައެވެ. ސޯޝަލް މީޑިއާގައި ދައުރުވަމުންދާ ވީޑިއޯތަކުން ފެންނަ ގޮތުގައި ފަތުރުވެރިންގެ މެދުގައި މަގުބޫލު ޕުއެރްޓޯ ވަލާޓާގެ އުޑުމަތި ވަނީ ހުޅުޖެހުމުގެ ސަބަބުން ކަޅު ދުމުން ފުރިފައެވެ.

މީގެ އިތުރުން ގުއަޑަލަޖާރާ އެއާޕޯޓުގައި ބަޑީގެ ހަމަލާތަކެއް ބަދަލުކުރެވުނު ކަމުގެ ރިޕޯޓްތައް ލިބުމާ ގުޅިގެން ފަތުރުވެރިންގެ މެދުގައި ބޮޑު ބިރުވެރިކަމެއް ވަނީ އުފެދިފައެވެ.

ސަލާމަތީ ފިޔަވަޅުތަކާއި "ރެޑް އެލާޓް"މި ހަމަނުޖެހުންތަކާ ގުޅިގެން ޖަލިސްކޯގެ ގަވަރުނަރު ޕަބްލޯ ލެމުސް ނަވާރޯ ވަނީ މުޅި ސްޓޭޓްގައި "ކޯޑް ރެޑް" ނުވަތަ ރެޑް އެލާޓް އިއުލާންކޮށްފައެވެ. އަދި ހޯމަ ދުވަހު އެ ސްޓޭޓްގެ ސްކޫލްތައް ބަންދުކޮށް، އާންމުން ގޭގައި ތިބުމަށް ވަނީ އަންގާފައެވެ.

އެމެރިކާގެ އެމްބަސީން ވެސް ވަނީ މެކްސިކޯގައި ތިބި އެމެރިކާ ރައްޔިތުން ރައްކާތެރިކަމުގެ ފިޔަވަޅެއްގެ ގޮތުން "ޝެލްޓާ އިން ޕްލޭސް" ނުވަތަ ތިބި ތަނަކުން ނުނިކުމެ ތިބުމަށް އިލްތިމާސްކޮށްފައެވެ.

އެލް މެންޗޯ އަކީ ކާކު؟

އުމުރުން 59 އަހަރުގެ އެލް މެންޗޯ އަކީ އެމެރިކާގެ އެފް.ބީ.އައި އާއި ޑީ.އީ.އޭ އިން އެންމެ ބޮޑަށް ހޯދަމުންދިޔަ އެކަކެވެ. އޭނާ ހޯދުމަށް މަގުފަހިވާ މައުލޫމާތެއް ދޭ މީހަކަށް އެމެރިކާ ސަރުކާރުން ވަނީ 15 މިލިއަން ޑޮލަރުގެ އިނާމެއް ވެސް ހުށަހަޅާފައެވެ.

އޭނާގެ ސީޖޭއެންޖީ ކާޓެލް އަކީ އެމެރިކާއަށް ގިނަ އަދަދެއްގެ ފެންޓަނީލް، ކޮކެއިން އަދި މެތަމްފެޓަމީން އެތެރެކުރާ، އަދި ޑްރޯން ބޭނުންކޮށްގެން ބޮން އެޅުމާއި އަސްކަރީ ހެލިކޮޕްޓަރުތަކަށް ހަމަލާދިނުމުގައި ކުޅަދާނަ، ނުރައްކާތެރި ގްރޫޕެކެވެ.

އޮފިޝަލުން ވިދާޅުވާ ގޮތުގައި އެލް މެންޗޯ މަރާލުމަކީ މެކްސިކޯގެ ރައީސް ކްލައުޑިއާ ޝީންބައުމްގެ ސަރުކާރުން މަސްތުވާތަކެއްޗާ ދެކޮޅަށް ކުރާ ހަނގުރާމައިގައި މިހާތަނަށް ލިބުނު އެންމެ ބޮޑު ކާމިޔާބީއެވެ.