ޑރ. މުހައްމަދު ޝަހީމް އަލީ ސައީދު ޖަލްސާއެއްގައި ވާހަކަދައްކަވަނީ ----
ގާނޫނު ތަންފީޒު ކުރާ މުއައްސަސާތަކުގެ ކަރާމާތް ނަގަހައްޓަން ޖެހޭ ކަމަށް ކުރީގެ އިސްލާމިކް މިނިސްޓަރު އަދި އިސްލާމިކް ޔުނިވާސިޓީގެ ކުރީގެ ޗާންސެލަރު ޑރ. މުހައްމަދު ޝަހީމް އަލީ ސައީދު ވިދާޅުވެއްޖެއެވެ.
ޑރ. ޝަހީމް މިފަދައިން ވިދާޅުވެފައި މިވަނީ ކޮމިޝަނަރު އޮފް ޕޮލިސް މުހައްމަދު ހަމީދު ކުލަބެއްގެ ތެރޭގައި ޕާޓީ ކުރައްވާތަން ފެންނަ ކަމަށް ބުނާ ވީޑިއޯއެއް ޝޯޝަލް މީޑިއާގައި އާންމުވެ ބައެއް ފަރާތްތަކުގެ ފާޑުކިޔުން އަމާޒުވެފައި ވަނިކޮށެވެ.
ޝަހީމް ކުރައްވާފައިވާ ޓްވީޓެއްގައި މިއަދު ވަނީ ބިރަކާއި ނުލާ އާއިލާ ގޮވައިގެން "ރާބޮއިގެން" ކުލަބުތަކުގައި ނަށާ މަޖާކުރާ މީހުން، ވެރިންނަށް ތިބެގެން ގައުމު ރަނގަޅު މިސްރާބަކަށް ހިނގައިދާނެތޯ ސުވާލު އުފައްދާފައެވެ. އެމަނިކުފާނު ވިދާޅުވީ ގާނޫނު ތަންފީޒު ކުރާ މުއައްސަސާތަކުގެ ކަރާމާތް ނަގަހައްޓަން ޖެހޭ ކަމަށެވެ. އިސްލާމީ ސަގާފަތާއި އަގީދާގެ ގަދަރު ކުޑަކޮށްލަން ފުރުސަތު ނުދެއްވުމަށް ވެސް ޝަހީމް ވަނީ ގޮވާލައްވާފައެވެ.
Biraka Nula Aailaa govaigen, Raaboyegen,Club thakugai nashai majaa kuraa meehun verinah thibegen Quamu rangalhu Misraabakah higaydhaaneba?Qaanoonu Thanfyzu Kuraa Mu'asasaathakuge Karaamathu nagahattan jehey! Islami Saqaafathaai Aqeedhaa ge Qadharu kudakollan furusathu nudhevva!
— Mohamed Shaheem Ali Saeed (@Mohamedshaheem1) May 11, 2020
ކޮމިޝަނަރު އޮފް ޕޮލިސް މުހައްމަދު ހަމީދުގެ އެ ވީޑިއޯއާ ގުޅިގެން އިދިކޮޅު ޕްރޮގްރެސިވް ކޮންގްރެސް ކޯލިޝަނުން ވަނީ ރައީސް އިބްރާހީމް މުހައްމަދު ސޯލިހާއި ހޯމް މިނިސްޓަރު އިމްރާން އަބްދުﷲ އަދި ނޭޝަނަލް އިންޓަގްރިޓީ ކޮމިޝަނުގެ ރައީސަށް ސިޓީއެއް ފޮނުއްވާ އެ މައްސަލަ މިނިވަންކަމާއި އެކުގައި ތަހުގީގު ކުރުމަށް ގޮވާލައިފައެވެ.
މީގެއިތުރުން ކުރީގެ ހޯމް މިނިސްޓަރު އުމަރު ނަސީރު ވެސް ވަނީ އެ މައްސަލާގައި ސީޕީ ހަމީދުގެ މައްޗަށް ކުރެވޭ ތުހުމަތު ބަލަން ހޯމް މިނިސްޓަރު އިމްރާން އަބްދުﷲ ކަމާބެހޭ ފަރާތްތަކުގައި އެދެން ޖެހޭނެ ކަމަށް ވިދާޅުވެފައެވެ.
އެހެންނަމަވެސް ސީޕީ ހަމީދުގެ ދިފާއުގައި ރައްޔިތުންގެ މަޖިލީހުގެ ރައީސް، ރައީސް މުހައްމަދު ނަޝީދު ވަނީ ނިކުންނަވާފައެވެ. އެމަނިކުފާނު ވިދާޅުވީ ސީޕީ ހަމީދަކީ އިހްލާސްތެރި ބޭފުޅެއް ކަމަށެވެ. އަދި ވައްކަމާއި ކޮރަޕްޝަން ހިންގާފައިވާ ފަރާތްތަކާއި ހައްދުފަހަނަ އެޅި ފިކުރުގެ މީހުން އަޑީގައި ތިބެގެން ސީޕީ ކުރައްވާ މަސައްކަތުގެ މިސްރާބު ބަދަލުކޮށްލުމަށް ފުރުސަތު ދެވެން ނޯންނާނެ ކަމަށް ވެސް ނަޝީދު ވިދާޅުވި އެވެ.
